" احاسيس مختلفة " حلم مش مجرد فرقة

فرقة ( احاسيس مختلفة ) من الفرق الموسيقية المختلفة التى تهدف الى التواصل مع كل من له " احاسيس مختلفة " فى معظم انحاء العالم , وإلى تقديم رؤية فنية مختلفة في الكلمة واللحن والشكل المسرحي والموسيقي.
وبدات نشاة الفرقة على يد الشاعر" رضا جويدة " والملحن " أحمد عبد المنعم "، ثم ضمت الفرقة العديد من المواهب المميزة والبارزة والتي منها المخرج " محمد الكاشف "والمطربين احمد شمس , محمود منسى , محمود غانم , عبير منيب , عماد صقر , مصطفى صديق والتعاون مع عدد من الشعراء من بينهم : كريم ابو المجد و ياسر الليثى وصلاح الزهار ورزق الفقى .
موهوب بيتسكع فى حوارى الشعر , مسرحية .. قصيدة .. اغنية , مش راسيلو على بر , يتعب من نحو الفصحى يلاقى فى العامية مفر ولما تخده الجلالة يكتب فى الفلسفة والفكر الشاعر : رضا جويدة وكان لنا هذا الحوار معاه "لصوت الامة"
- مين هى فرقة ( احاسيس مختلفة ) والبداية كانت امتى ؟
احاسيس مختلفة بدات حوالى من 2005 , وتاريخ الفرقة محسوب على عمرها لاننا كنا بنشتغل شوية ونقف شوية , وفكرة احاسيس نبعت من اننا نقدم حاجات راقية تتناول قضايا تكون ليها رسالة , وكانت البداية برضا جويدة واحمد عبد المنعم والمخرج محمد الكاشف , وعملنا اول حفلة على ساقية الصاوى وتوقفنا فترة و بعدها قدمنا شكل جديد باستعراضات والقاء شعر وكانت اول حفلة لاحاسيس بمزج الشعر بالغناء والموسيقى ودا السبب ان اسم الفرقة احاسيس مختلفة .
- مين كان صاحب الفكرة ؟
صاحب تكوين الفرقة رضا جويدة , وصاحب فكرة اسم الفرقة احمد عبد المنعم .
- بتحبوا تناقشوا ايه فى الاغانى الخاصة بيكوا ؟؟
احنا همنا مصر والناس البسيطة , يعنى كنا بنغنى تراك لعم فؤاد نجم رحمه الله عليه ( الناس الناس شغلتنا الناس ) الناس هى همنا لان احنا منهم والناس البسيطة اللى ملهاش صوت اللى مش قادرة تعبر عن نفسها ومشاكلها دا هو هدفنا .
- فى بعض الفرق بتقدم اغانى تراثية فكرتوا تعملوا حاجة زى كدا ؟
اتعرض عليا الفكرة دى وفكرنا اننا نعملها بس بعد ما نعمل بصمة للفرقة وشكل الناس تعرفنا بى وتتعود عليه .
واتحدثنا ايضا لبعض مطريبى الفرقة من بينهم المطرب " محمود غانم "
انا اسمى محمود غانم من السويس ابتديت غناء من 2004 اتدربت فترة على عزف اله العود واتعرفت على رضا جويدة وهنقدم اغنية اسمها (بحلم اسافر )
واضاف رضا جويدة ان كان مقدمين اغانى رومانسى واغانى بتعالج قضايا وكان فى اغنية من ضمنها اسمها ( نعمل ايه )
كلماتها : نعمل ايه نعمل ايه الناس بتصرخ من غير صوت الناس بتتالم فى سكوت ولا لون ولا طعم ولا جرح يلم عايشين بالاسم لكن بنموت ) ونبتدى نستعرض بعض مشاكل المجتمع ذاك الوقت وممتدة الى الان وكان من ضمن المشاكل اللى بتتناولها الشباب ومشاكل العيش والحرية والعنوسة , والانتاج دا قبل سنة 2008 قبل الثورة .
احنا بنتقى الكلمات جدا ومعانا شعراء فى الفرقة معنا الشاعر : ياسر الليثى , كريم ابو المجد , صلاح الزهار, ومعانا شعراء تانية كتير لان الفرقة مفتوحة لاى مبدع
وتحدثنا ايضا الى احد مطربى الفرقة " عبير منيب "
احكلينا عن تجربتك مع فرقة احاسيس مختلفة ؟
كان ليا الشرف انى اشترك فى الحفلة السابقة وقدمت مع الفرقة تراك (يا قلوب ) كلمات و الحان : رضا جويدة , واتمنى انى اكمل مع الفرقة لان الفرقة مختلفة وفكرتها جميلة وهى عبارة عن حلم مش مجرد فريق وبيحاولوا يقدموا كل مرة حاجة جديدة
و اضاف مخرج الفرقة " محمد الكاشف "
احنا فى الباند اتعاملنا بطريقة جديدة على شكل الباندات الاخرى , احنا بندخل شوية عناصر مسرحية مع الغنى والموسيقى فدا مخلى الموضوع لى شكل مسرحى اكتر واختارنا المسرح عشان هو يعتبر اشمل الفنون.
- مين المطربين اللى تحبوا تشتغلوا معاهم دويتو ؟
(حميد الشاعرى) لانه حميد مدرسة وقيمة كبيرة ويعتبر صانع نجوم وانا اتربيت على موسيقته وانا طفل كنت بسمع اغانيه اتشرف اشتغل معاه ونفسى اننا ننال اعجابهم .
- ايه الاغانى و الحفلات الجديدة اللى هتقدموها ؟
فى حفلة لينا فى النص التانى من شهر مايوفى ساقية الصاوى , وهنقدم اغنية جديدة لينا بعنوان ( بحلم اسافر )
- ايه اللى بتمنوا للفرقة ؟
اولا احنا لا نسعى لمال ولا نسعى الى شهرة مزيفة , احنا اصحاب رسالة الموضوع عندنا اننا بنقدم اللى بنحبه ومقتنعين بى ويبقى لينا دور فعال فى المجتمع فى اصلاح وتوجيه , المقصود اننا نعالج قدر استطعتنا واقعنا وهمنا الاكبر الناس البسيطة .
- وايه اللى تتمنوا لمصر ؟
بنتمنى مصر ترجع مصر , البلد دى عظيمة اوى وكبيرة اوى و قليل اوى اللى بيحبوا البلد دى بجد .