بالفيديو .. تالتة تالت : انتظروا البوم "رومانتيكا" الجديد

التقت صوت الأمة ب "محمود شابورى" و "هانى كمال" أصحاب باند "تالته تالت" علشان نعرف اخر اخبارهم ونتعرف على احلامهم وطموحاتهم.. اليكم الحوار:
ما سبب تسمية الباند بتالتة تالت؟؟
دورنا كتير على اسم لينا وبعدين لاقينا ان كلنا مرينا بتالتة تالث تالتة تالت اعدادى وابتدائى وثانوى والاسم جامع ما بينا.
مين صاحب الفكرة؟
صاحب الفكرة هو محمود شابورى لان اغلبية الالحان بتاعت الاغانى بتاعته واللى بدأ مع مروان واحمد سالم وابتدا الموضوع بقى ياخد شكل فرق ال ""under ground
بتحبوا اى نوع من الموضوعات لأغانيكم ؟
المواضيع الاجتماعية اكتر , مثلا فى اغانى بتتكلم عن الشخص الانطوائى او عن الاعلانات او عن الناس والنفاق زى"بطل تحكيلى" واحنا دايما بناقش الموضوعات العامة بعيد عن بحبك وواحشتنى.
فى بعض الفرق دلوقتى بتقدم الاغانى التراثية فكرتوا فى النوع ده قبل كدا ؟؟
هى ممكن الفرق دى بتعمل دا بشكل اساسى بس احنا فكرنا نعمل دا بشكل مختلف اختارنا 3 اغانى قديمة هى "قلبى ومفتاحه" , "الدنيا ريشة فى هوا" واغنية تالتة معاهم" وعملناهم فى شكل اغنية بتوزيع جديد.
فكرتوا مثلا تقدموا فى برامج المسابقات زى arab got talent""؟
لا خالص , الموضوع معانا مختلف عن الفرق التانية، اغلب الفرق هو مجموعة صحاب عايزين يعملوا حاجة عايزين يعملوا مزيكا حلوة وابتدوا يتعرفوا لكن احنا الموضوع معانا جه مختلف شوية اولا كلنا صحاب من زمان لكن كل واحد عاش حياته وشغله يعنى كان فى الموزع والملحن مع اكبر نجوم فى البلد يعنى كانوا بيلعبوا مع عمرودياب وتامر حسنى ومنير فكلهم معروفين فمجموعة الصحاب دول عاملوا حاجة مع بعض ليهم هم احسن من فكرة المسابقات وفكرة التقييم وبعدين احنا عدينا المرحلة دى سنيا وهى بالنسبة لينا فكرة مش مستحبة يعنى.
تعتمد اكتر فى اختيار الاغانى انك تركز على رأى الجمهور ولا أهل الموسيقى نفسهم ؟
لا طبعا اكيد بنهتم براى الجمهور اكتر , اغلب الفرق بتناقش المواضيع اللى هى عايزاها، عشان الاغنية دى توصل للناس يعنى مثلا زى اغنية عن حد انطوائى بوجه لى الكلام عشان يتغير وغيرها من الفرق وسط البلد وكايروكى اومسار اجبارى هى بتناقش قضية معينة زى اثبت مكانك.
مين المطربين اللى تحبوا تعملوا معاهم دويتو غنائى ؟
يعنى احنا بنرحب باى حد من المطربين واحنا فعلا شغالين على حاجة ونحب مثلا نشتغل مع محمد فؤاد.
ايه التحضيرات للفترة القادمة وايه الجديد بالنسبة ليكوا ؟
احنا بنحضر دلوقتى لنزول الالبوم الجديد بتاعنا، وفى الغالب هيبقى اسم الالبوم (رومانتيكا) , وبعدين اوضاع البلد مش مستقرة عشان نعمل حفلات ونعمل حفلة ومثلا يكون حد ميت امبارح فى الاحداث اونجهز لحفلة وحاجة تحصل والجمهور ممكن ميجيش بنفس الكم المتوقع.
ايه رايكوا فى الاحداث السياسية دلوقتى ؟
يعنى كل لما تفتح التليفزيون دلوقتى تلاقى مشاكل ودا يفضح دا ودا يتكلم على دا ومفيش حلول , ومحدش مثلا بيقول تعالوا مثلا نعمل مليونية بكرة تعالوا ننضف ميه نهر النيل مثلا،
وفى قاعدة دلوقتى بقت موجودة معندهاش هدف يعنى الثورة من اجل الثورة فقط ودا معناها خراب، يعنى مثلا 25 يناير قامت عشان هدف زى اسقاط نظام مبارك او 30 يونيو اسقاط نظام مرسى والاخوان يعنى كل يوم جمعة ثورة دى الاسماء خلصت يعنى من كتر الثورات يعنى عايزين نهدى ونبتدى شغلنا والحكومة بردو توفر حاجات كتير عشان نعرف نشتغل ونرجع تانى لحياتنا الطبيعية .
ايه رايك لو اترشح المشير السيسى للرئاسة ؟
انا شايف ان هيبقى فى ميزة كويسة ان هو عليه توافق شعبى كبير, فمعنى كدا ان ممكن يحصل حالة من الهدوء واحنا هنديله فرصة انه يشتغل وهو تقريبا يشبه جمال عبد الناصر فى حاجات كتيرة .
ايه اللى تتمناه لمصر وفرقة تالتة تالت ؟؟
هم الاتنين مرتبطين ببعض يعنى نفسنا ان البلد يمشى حالها عشانا احنا كمان حالنا يمشى.