يوميات مواطن مفروس

· لن يرتاح الدكتور بطرس وزير الضرائب العمومية، ويتوقف عن صرف الملايين علي إعلانات المخفي عبد القوي
الدكتور بطرس غالي خازن بيت المال، وصاحب أجدع شعار في 2009، ياساتر ياساتر من قنطرة الدفاتر.. ياعبد القوي، وماحدش عارف لحد دلوقت، مين المخفي علي عينه عبد القوي ده، اللي سعادة الدكتور شايل منه جدا، وصارر في قلبه وساكت، والود وده.. يخليه يجر عربيات كارو، وكل شوية يلسعه علي جتته بالكرباج، لن يتوقف ويهدأ باله، حتي يفوترنا كلنا دفعة واحدة بالخزرانة، ويقعدنا قدام السيدة، أو أي جامع قريب، خاصة وبلدنا مليانة جوامع بسم الله ما شاء الله، يعني ما حدش هينام في الشارع، والصبح.. يبعت بتوع الضرايب، يوزعوا علينا عيش وفول نابت، علي اعتبار أن البروتين النباتي أجدع ألف مرة من البروتين الحيواني، المليان أمراض وبلاوي زرقا، من كثرة قعاد البهايم الصايعة مع الخنازير اللبط علي الكورنيش، يبوسوا بعض.. لن يرتاح الدكتور بطرس وزير الضرائب العمومية، ويتوقف عن صرف الملايين علي إعلانات المخفي عبد القوي، بدل ما يخصمها من الضرايب، أو يفتح بها مستوصف صغير، لأصحاب الحالات الحرجة من ضحايا الضرائب، حتي يجعل مصر كلها شاطيء للعراة، عشان الخواجات يتفرجوا علي اللحم الأبيض المتوسط، اللي مليان دهن وشغت، أو حتي نصبح جميعا محمية طبيعية للحياة البرية، يجب أن تحافظ عليها اليونسكو.. وجمعيات الرفق بالحيوان، فسيادته لا يحب غير أغنية أم كلثوم.. أنام وأصحي علي ضريبتك.. بتقولي عيش، وفيلمه المفضل سلفني تلاتة جنيه، ومسرحيته الوحيدة.. بهلول.. بيحصل الضريبة في اسطنبول.. لذلك.. كل طلعة شمس.. يخرج علينا بضريبة جديدة، آخرها الضريبة العقارية، وليست ضرائب الدكتور بطرس لمصلحة الناس، فنحن بالاضافة للضرائب، ندفع مقابل الخدمات المفروض أن نحصل عليها مجانا، ندفع رسوما للطرق، والعيان قبل ما يدخل مستشفي حكومي، بياخد معاه الحقن والسكاكين، ورجل صناعي لزوم الطواريء، والمدارس.. الشركات الخاصة هي اللي بتطورها، يعني فلوس الضرايب رايحة أساسا للحكومة الغلبانة العريانة ياضنايا، عشان تشتري كام جلابية كستور، وكام بطانية صوف العسكري، وتقعد علي القهوة تضرب حجرين معسل، عشان تعدل مزاجها، وتعرف تتعامل مع الأهالي الصيع.
محمد الرفاعي