احتفالية «100 سنة سينما».. 80 سينما.. و20 قوادة!!

مريم فخرالدين في حوار جريء:

· تكريمي في مهرجان الإسكندرية تم رغم أنف ممدوح الليثي
بمناسبة احتفالية 100 سنة سينما في مهرجان الإسكندرية كرمت الفنانة الكبيرة مريم فخرالدين وهي التي سبق تكريمها مع العالمية صوفيا لورين ضمن ثلاث مرات كرمت فيها من قبل مهرجان القاهرة.
قالت اليوم تم تكريمي غصب عن ممدوح الليثي، الذي رفض تكريمي علي مدي الدورات السابقة كما انتقدت بذخ الإنفاق علي مهرجان الإسكندرية.. وقالت: مهرجان مش جايب تمنه.
وعلقت علي احتفالية 100 سنة سينما بقولها - 80 سينما و20 قوادة.
وأضافت نصف البنات محجبات والنصف الآخر مشلحات وإلي نص الحوار الساخن.
ما شعورك بهذا التكريم؟
- بالتأكيد شعور جميل وأشعر أنني قدمت كل شيء كدليل لهذا التكريم.
هل تأخر التكريم؟!
- تأخر كثيرا وفي كل دورة كان يتم ترشيحي كان ممدوح الليثي «يقلشني» والكلام اللي قلته في حفل الافتتاح كان موجها إلي الليثي.. وزمبة قدام أربع زنب بتوع الدورات اللي فاتت.
ولماذا اعترض الليثي علي تكريمك خلال الدورات السابقة؟
- يمكن علشان أنا مبعرفش أجامل والنهاردة أنا بتكرم غصب عن ممدوح الليثي وغيره، مع أني اتكرمت قبل كده 5 مرات فتم تكريمي من مهرجان القاهرة لوحده 3 مرات ومن بينها تم تكريمي مع صوفيا لورين.
وكيف ترين مهرجان الإسكندرية هذا العام؟!
أري أنه مهرجان لا يرتقي إلي العالمية، مهرجان علي اسكندراني والناس شيفاه كده، ومش عارفة ليه البهرجة والفلوس دي كلها ليه، مع أنه مهرجان مش جايب ثمنه وتساءلت: احنا كسبنا من المهرجان إيه.. مصر كسبت إيه؟ ده السؤال بتاعي في حد من أوروبا جه ولا يمكن أبدا مقارنة مهرجان الإسكندرية بمهرجان القاهرة «اللي بيجيب نجوم من أوروبا والناس تبقي شيفاهم.
وكيف ترين الاختلاف بين سينما الماضي والحاضر في ظل الاحتفال ب 100 سنة سينما؟!
- بيقولك 100 سنة سينما أنا بقول لك 80 سنة سينما و20 قوادة.. شوف.. العشرين سنة الماضية مفيش سينما، أنا بعتبرها تهريج «بلاش قوادة».
ومن السبب في ذلك من وجهة نظرك؟!
- بقت المسألة أن كل واحد عايز ينجح وخلاص مبقاش فيه كتاب زي توفيق الحكيم أو يوسف السباعي وغيرهم من الكتاب الذين امسكو بالقلم من أجل الكتابة فقط، وليس من أجل الشهرة.
رصيدك السينمائي 240 فيلماً.. فما هو الفيلم المغضوب عليه من مريم فخر الدين؟!
- ولا فيلم.. ال 240 فيلماً أنا راضية عنهم جدا، ولا يوجد مشهد واحد أتبراء منه لأنني عندما كنت أقرأ أي فيلم كنت أبحث بداخله عن الله وعن الرسالة التي يمكن أن يوجهها العمل فلو أدركت الله عملت الفيلم والعكس صحيح.