قصيدة "يامينا طالع بالمظاهرة لفين" لحسين جعفر

يا صحرا كوني أمينة ع الغاليين
دولا ولاد النيل على الشطين
بيخضروكي ف الحياة والموت
ويطلعوكي غيطان تعلى بيوت
ويطلعوكي نهار يشق تابوت
بأستاذ وعامل
وتلميذ وطالب
وفلاح ممعشق
وسواق ملابط
يحبوا بعض
ويكرهوا الظابط
ويعلموكي تغني للأجيال
الثورة طالعة صليب ف حضن هلال
يا مينا طالع بالمظاهرة لفين
والكرسي عسكر نجّس الهرمين
يا مينا طالع بالمظاهرة منين
والكرسي عسكر ماله ملة ودين
يا مينا طالع بالمظاهرة لمين
واحنا اللي ثورنا غرزنا تاني ف طين
يا مينا عايز شقة ف الضاهر
:من عيني حاضر.. مين معاك تاني
فيتا وواحد تاني ويانا
اديني بس سبوع وارد عليك
حبيبي انت و بوسة على خدي
وضحكة طالعة تلعلع
كنت حاسبها هاتهدي
أتاريها هدّت كتافي وقلبي متغرّب
مابين وجع شخصي ووجع شخصك
ماشي متكهرب
عمّال بيتهرّب
ويقول: هاتحلى
بس المر كان أقرب
يا مينا رد عليا
: البوسة ديّه اردهالك كيف
وانت تحت الأرض عمال تضحك
وانا وفهمي وبديع عايشين بلا تصريف
هتعدي ع البورصة تسأل أسئلة تضحك
ولا تسيب لاسئلة تبحث على التصنيف
هاقول لشيخنا كفاية مماينة للسلطة
وتقول لابونا كفاية بقى تخويف
يا مينا رد عليا
:لاقيتلك شقة ف الضاهر
تيجي تقابل صاحبها
صاحبها عسكري فاجر
بيسلط البلطجية يقفلوا الشارع
ويضربوا نار على النعش
ورمسيس اللي اتنقل سامع
وانت بتضحك وتقول الحياة خسارة
مجلس دعارة حتى لعزرائيل دافع
يا مينا وحّدت قطرين ومش قادر توّحد دول
أحزاب خسيسة
أرجل ما فيها اشتغل للعسكري دلدول
نخبة رخيصة
أشرف مافيهم بالشاشات مشغول
هم يقولوا الرياسة
وانت تقول الغلابة
هم يقولوا الكياسة
وانت تقول العدالة
هم يقولوا انتخاب
وانت تقول الديابة
أحزاب بتضحك عليك
وانت بتضحك عليهم
والبت ماري بسيط
تلعن أبوها وأبوهم
وصفا وهاني وبهاء
بيلعنوا مين جابوهم
أحزاب بتضحك عليك
وانت بتضحك عليهم
يا مينا والزغاريط طالعة من المستشفى
بتقول يا مجلس عصابة شرفكوا إتوفى
واحنا شرفنا بيحيا كل يوم بالشهدا
ومصر تاخد ولادها ولما تستكفى
تردهم بالنور وتبص للزمن يهدى
يسمع كلامها الزمن وكل حرف بأمر
واحد كبير العصابة بدل القصر يسكن قبر
اتنين حق الشهدا قبل أيُها أمر
تلاتة باقي الديابة ما يطلعوش م الجُحر
أربعة الكل حر ف ديانته ومفيش كلام عن كُفر
خمسة كل اللي يعرق يتبسط م الأجر
ستة العدل يرفع راياته كل عشاق مصر