محتاج تغيير

أوع فى يوم تتخيل بإنك ملاك وإن الغلط بعيد عليك وأن إللى حواليك عايزين بس الخير
أوع تنسى فى يوم وتقول استحالة أنا أعمل كده وتجى فى يوم وتعمل زيهم وساعتها تقول إزاى أنا عملت كده ممكن ساعتها لما شفت أخيك بيعصى ربنا سخرت من جواك عليه وبدل ما تقول ربنا يهديه فضحته وقلت هو إزاى بيعمل كده وفرحت بنفسك وقلت دانا عمرى ما أعصى ربى زيه كده ونسيت حديث النبى ما تصلى عليه
(يا معشر من آمن بلسانه ولم يدخل الإيمان قلبه لا تغتابوا المسلمين، ولا تتبعوا عوراتهم ، فإنه من اتبع عوراتهم يتبع الله عز وجل عورته، ومن يتبع الله عز وجل عورته يفضحه فى بيته).
اوع يا صاحبتى تقولى انا بنت قوية ومؤمنة بربنا، أنا عمرى ماهكون زيهم وتحسى بجواكى بغرور يقول أنا بنت لقطة مفيش زيى، أنا ومين دا يقدر يقربلى كده وبعد شوية تلاقى نفسك وقعت زيهم وتسألى هو إزاى حصلى أنا كده أنا هقولك يا حبيبتى غيرى كلامك وقولى أنا ربى حافظنى وأكيد بإذن ربنا عمرى مهقع زيهم هتلاقى نفسك قوية بربنا وإن غلطت هتلاقيه بسرعة رجعك لأنه عارفك بأنك أمة تقية وكنت دايما بتطلبى حمايته من إللى زيهم
ولا إنت يلى تملى طول أنا فلان مش بيصلى وبدل ما تغير منه تفضل تملى ليل ونهار تضحك عليه وتقوله دانا وأنا ومفيش غير أنا، لحتى ما فى يوم تقع زيه وتقول إزاى أنا سيبت صلاتى دانا كنت مواظب على الصلاة إنت نسيت ترقيتك عليه ولا أفكرك ولا خلاص افتكرت ضحكتك لما كانت ترن من سخريتك.
ونسيت قول ابن القيم لما قال ما من عبد يعيب على أخيه ذنبًا إلا ويبتلى بهذا الذنب) عرفت ليه الوقتى ليه بقيت كده.
اوع يا ظالم فى يوم تفتكر بأنك أقوى من إللى ظلمته لأ دانت أضعف من مظلوم لأنك وأنت بتظلم نسيت إنك بتظلم نفسك ول
أنك ظالم مش هيكفى فيك كلام ولا منى ولا حتى من غيرى وأسيبك منك لربك إللى خلقك هياخد الحق من غير كلام.
وإنت كمان أيوة إنت ياللى عامل نفسك ملاك وشايف نفسك حد غير تضحك على كل واحدة وتقول دانا دانجوان إنت نسيت أن حسابك هيجى فى الدنيا وساعتها تقول ياريت إللى جرى ما كان.
اوع يا بنتى يا إللى تملى طولى إنك طيبة ومالكيش فى حاجة زيهم تسيبى نفسك لحد عامل نفسه طيب وتقولى يا سلام دا هو دا الملاك إللى أنا بحلم بيه يكون زيى كده طيب وما لوش فى حاجة زيى تمام، وبعد شوية تلاقيه طلع حدتانى والطيبة ما لهاش فى قلبه مكان المهم سيبك من إللى فات وكويس إنك رجعت من تانى لربك بس اوعى تكون هتهجرى بذنبك وعشان تاخدى حقك تقولى اسمه فى كل مكان خليها فى سرك وادعى ربك وهو أكيد هيجبلك حقك.
اوعى يا نفسى تفتكرى نفسك غير دا انت زى دول محتاج تغيير واعرفى انك معاهم مش معصومة من الخطأ
وفوقى من اللى انتى فيه.
لأ إنت بشر تغلط مرة وتوب مرة بس الأهم إنك تحاول تعمل إللى يرضى ضميرك واوعى تتغش بناس عاملة نفسها ملاك لان الملاك اسمى من اللى زى واللى زيك واوعى تفضل تقول بكرة أتوب أصل بكرة مش بايديك دا ربنا بس من رحمته بيسيبك تتوب.