التركيز الزائد يساوى العبقرية

السلام عليكم ورحمة الله وبركاته
اللهم لا سهل إلا ما جعلته سهلا فأجعل بحولك كل صعب علينا سهلا فإنك إن شئت تجعل الحزن سهلا
سبحانك لا علم لنا إلا ما علمتنا إنك أنت العليم الحكيم
كل واحد فينا عبقرى من داخله فلا أحد يعتقد إنه شخص عادى لأن ربنا خلق داخل كل واحد فينا ملكة العبقرية فى شيىء مُعين ومحدش يعتقد إن الله خلقه كده وخلاص دور عن ذاتك فتش عن حاجه إنت متفوق فيها وبارع وهتجدها بمعونة المولى عزوجل إنت مش أقل من أى حد من العباقرة
عندما تجد هذه الملكه التى تتسم بها إجتهد وصدق نفسك وإعزم على تحقيقها وتمسك بها ده حلمك إوعى تضيعه أو تتوقف لحظة وبكده لو نجحت فى تحقيق حلمك هتبقى عبقرى فأنت لست أقل من توماس إديسون شوف جرب كام مره فى إختراع المصباح وحاول ووصل لإنه صدق نفسه وإجتهد فى تحقيق حلمه وكمان بيكاسوا الرسام المشهور ومايكل جوردن
كن كصحابة النبى صلى الله عليه وسلم وإجتهد شوف هما كانوا متفوقين إزاى فى كل المجالات جرب وحاول طالما عرفت طريقك وإوعى أى حاجه توقفك ولا تلتفت خلفك فالملتفت لا يصل ولو لقيت حد بيحبطك متسمعلوش خليك واثق فى نفسك وصدقنى طول ما إنت ماشى فى طريقك ربنا هيفتح لك أبواب كثيره أوى لو لقاك مُصمم وبتجتهد طول ما ربك موجود مش هيضيع تعبك لإنه هو اللى قال كده فى كتابه الحكيم إنا لا نضيع أجر من أحسن عملاً" سورة الكهف 30
فلماذا انت مُتخيل إنك متقدرش إنت تقدر بس الموضوع محتاج عزيمة وإصرار سيب الكسل وإتحرك محدش أشطر منك ولا أنجح منك كفايه إنك من أمة النبى صلى الله عليه وسلم
طب شوفوا بيكاسوا بيحكى قصة بيقول
كان فى امرأة فى السوق شافت بيكاسوا فلما شافته جابت له قطعة من الورق وقالت له بسعادة وحماس أنا من أشد المعجبين بك ممكن ترسم لى أى شيىء فرسم لها لوحة سريعة جداً وأعطاها لها وقال لها ستساوى هذه مليون دولار فالسيدة قالت له إنت لم تستغرق إلا 30 ثانية فى رسم هذه اللوحة فضحك بيكاسوا وقال لها انا احتجت 30 عاماً حتى أتمكن من رسم هذه التحفة فى 30 ثانية
اصل فى معادله بتقول التركيز الزائد يساوى العبقرية
إكتشف يا صاحبى اللى بيميزك وإجتهد فيها وذاكر واتعب وتفوق على نفسك حتى تحقق العبقرية فى هذا الشيىء شوف إنت مُتميز فى إيه لازم تكون مُتميز فى حاجة أصل ربنا خلقنا كل واحد فينا له ميزة فى حاجه مختلفة عن الثانى ولما تكتشف هذه الميزة إسعى وربنا هيحقق لك حلمك علشان تسيب بصمة الناس تفتكرك بيها وقضية تعيش من أجل تحقيقها وساعتها هتحس انت عبقرى ولا لأ ؟ بس إصبر الموضوع محتاج صبر
وانت اللى هتحدد مش الناس أوعى حد يحبطك قيم نفسك بنفسك وإنت تقدر صدقنى يا صاحبى ولو كان فى حد مرجعيتك يقيمك لازم يكون حد اهل للثقة مش بتثق فيه بس لأن ممكن تثق فيه بس مش أهل للثقة والفرق إن الأهل للثقة مُتخصص فممكن والدك يكون ثقة بس مش أهل للثقة فى موضوع مُعين زى مثلاً سؤال فى الدين لازم تسأل حد مُتخصص
وصلى اللهم وسلم وبارك على سيد المُرسلين والحمد لله رب العالمين