ماما.. بحبك

الجنة تحت أقدامها وهى أفضل كائن على الأرض يكفيك دعوتها وأنت خارج وبصوتها الحنين تقولك: ربنا يستر طريقك.
كفاية إنها استحملت وجع 9 شهور على بال ما سيادتنا نشرف الدنيا وبعد الولادة هات يا رضاعة وسهر الليل بطولة مع عياطك والبيت كله نايم يا عينى وهى بقلبها وحضنها لك صاحية لغاية ما تنام وتطمن انك مستريح.
يا سلام لما بيكون نفسك فى حاجة وتحس بكده من عينيك علطول تحاول تعملهالك من غير تعب أو زعل على عكس البعض بتطلب الوالدة منهم حاجة ويبقوا قايمين مكشرين ومضايقين.. فعلا مفيش زى قلب الأم الحنين.
مش بتشوفها وهى قلقانة عليك وقلبها بيدق ولا صوت مدفع من خوفها عليك وأنت راقد تعبان ونايم بتتوجع وبتبقى عايزة حتة منها تدهالك بس أنت تقوم وتخف.. عشان بتحبك فوق ما تتصور.
لو احتجت أى مساعدة تأكد أن أمك هى أول واحدة هتقف جنبك وهتعمل المستحيل عشان ترضيك وتبقى مبسوط.
يا سلام عليها وهى بتحضر لك الأكل اللى بتحبه وتجيبلك اللبس اللى أنت عايزه وتقولك بحنية طلباتها اللى عايزاها وغالبا ما بتكونش طلبات تبع ست الحبايب.
غالبا الطلبات بتكون زى كده:
خد بالك من نفسك يا ابنى وأنت راجع بالليل.
ابقى البس هدوم تقيلة وأنت خارج عشان صحتك يا حبيبى.
ذاكر أنت بس وانجح وأنا أجوزك اللى أنت عايزها.
لازم تأكل كويس عشان صحتك يا ابنى.
وغيره من طلبات ست الحبايب اللى تستحق كل يوم نبوس إيديها ورجليها على كل كلمة حلوة بتقولها لنا وكل ابتسامة من قلبها بتضحكهلنا ولمسة ايديها الحنينة وهى بتطبطب عليك وأنت زعلان وحضنها اللى بتنيمك فيه وأنت تعبان.
صدقنى البيت من غير ست الحبايب يبوظ هيضرب يقلب ولا حد هيعرف يعمل حاجة عدلة من غيرها.
شوف كده لو تعبت يوم هتلاقى نعكشة فى البيت ومواعين فى الحوض وتراب فى الشقة ولخبطة وزحمة ولا زحمة المولد.
قلبى مع كل من فقد أمه فهو بالطبع يشعر بالحنين إليها ليس فى عيدها فقط ولكن فى كل لحظة تمر عليه بدون أمه الحنون.
وربما فى سماع أغنية "ست الحبايب" ما يثير الشجن فى نفوس من فقد أمه ومن تعيش بجواره ويدعو الله أن يبقيها جانبه بخالص الستر والصحة والعافية.
لو عايز تجيب لوالدتك هدية.. فالموضوع مش مكلف.
كل ما عليك إنك تعمل كل اللى يرضيها ويفرحها وصدقنى عمرها ما بتطلب وتستنى ومقابل وهتلاقى ست الحبايب أكتر واحدة تبلع لك الزلط وبيبقى قلبها بيتقطع عليك لو زعلتها وهى علت صوتها عليك.
شوف قد إيه هى حنينة؟
لو كانت كل النساء بقلوب الأمهات لكان الرجل سلطان زمانه.
أمى الحبيبة كل سنة وأنتى طيبة وكل عام وانتى بصحة وعافية وتشوفينا زى ما أنتى عايزة وتحبى يا أمى.
ماما.. بحبك.
اللى فى قلبك روح دلوقتى قوله للست الوالدة من غير مقدمات بس عبر عن حبك ليها وشوف الفرحة فى عنيها.
متنساش العظيم بابا تحييه وتبوس ايده لأن من غيره ماكانش فيه عيد أم
و كل سنة وأمى الكبيرة مصر.. بخير.