إيمان صبحى تكتب:لو عايز توصل...متحلمش وبس!!

الإحباط والخوف والكسل كلها عوامل مصاحبة لقلة الثقة فى النفس....كتير منا بيحلم بس, بس عمره ما حاول بجد بجد يفضل ورا حلمه لحد ما يحققه للآخر... وده بيرجع للخوف من حاجتين، الأولى إن العمر يجري وهو بيدور على الحلم ده.. الحاجه التانية هي طموحاته، انه يبقى مع شريك حياته فى أسرع وقت.
إنك تكون إنسان ناجح عمره ما كان بالسهل ولا كان بالتمني إنك تكون كذا وكذا... حتى لو كنت بتحلم ببيت سعيد وأسرة سعيدة، فأكيد ده كمان محتاج منك مجهود كبير, محتاح منك إنك متكونش "مجرد"
إنسان بتآكل وبتشرب وبس, ماتكونش "مجرد" موظف بيشتغل وياخد فلوس كل أول شهر وخلاص.
ماتكونش "مجرد" شيء وجوده لا يحدث أي شيء، صدفة بعتها القدر..ولا تبقى "مجرد" حلم مالوش أساس في الواقع...
ولكن يجب أن "تكون" شخص مجرد تواجده يترك أثر في كل مكان وبصمة فى كل قلب.. على الأقل إترك بصمة فى حياتك لأنك لما بتكون شيء "بلا قيمة" حياتك بتدبل وبتتجرد منك حقوقك وأحلامك وطموحاتك ونفسك, بتكون قطعة شطرنج تحركك الحياه بدون أي مقاومة منك وبتكون في الآخر راضي لمجرد إنك راضيّ!!!
إنت الحديد اللي يخلي حياتك خاليه من أنيميا الاحلام, إنت الإيجاب والسلب في مشوارك.. يا تطلع نفسك فوق وتبقى قوة دفع.. يا تبقى عامل زي السلم اللي بينزل لتحت بس.
محدش هيحلملك، محدش هيشتغلك، محدش هيختار شريكة حياتك غيرك، لأن محدش هيسعدها غيرك،ومحدش هيحقق أحلامك معاك غيرها،إختيارك وحياتك ملكك إنت...ضعفك فى قوتك إنك تشوف نفسك بجد ضعيف فى إيه و إيه هي نقط ضعفك اللي بتبعد بينك وبين حلمك, إشتغل عليها وقويها وتمكن منها وخليها ميزة قبل ما تتحول عيب يبعدك عن حاجات كتير، شوف متطلبات حلمك إيه واللي ناقص فيك إعمله بس إعمله لأنك بجد عايز توصل مش ل"مجرد" إنك بس تعمله.