نظرية القفا!

أخيرا.. بعد العذاب والضنا.. والست مرجانة.. طول يومها نشوانة.. خلع العرب عمة البلاغة المقلوظة، ونزلوا برطعة من فوق بغال المراثى الطويلة، والنحو والصرف اللغوى والصحى، وبدأوا عاصفة الحزم على طريقة المناضل فهد بلان حنا للسيف.. وحنا للضيف.
سبحان من يحيى العظام وهى رميم.
وبشار الأسد .. أطول قفا عربى معتبر، ولا قفا المعزة، اعترض على عاصفة الحزم، جايز خايف على قفاه من ايد الحرس الثورى النورى، اللى قد خف الجمل.
- على رأى محمود عبدالعزيز .. والقلب منك مليان جفا.. بعدما ضيعته بعندك يا قفا.. آه يا قفا.
وزير خارجية العراق، قريب الراجل النحس بتاع العلوج الامريكان، هز ليته وقال: نرفض الضربات العسكرية فى اليمن وندعم الحل السلمي.
- طيب ما تبدأ أنت الأول يا شرفنطح أفندى الحل السلمى مع داعش واحنا فى ديلك على طول، ولا الحل السلمى بتاعك من غير أستك.. كل ما تلبسه.. يقع ! ولا المدام خدته عملته بامبرز للأولاد؟
= واحد بيقول للتانى.. إزاى السيسى يبوس المخفى على عينه؟! مش خايف من العدوى؟!
- التانى قاله: وعلى رأى عزيز عثمان.. نهار ما شفته.. تعبان قرصني.. رقدنى جمعة. ويوم ما بوسته.. ميل وعاصنى.. من بقه دمعة.
= يا ترى الولية المعتوهة توكل كرمان لسه (بتخزن) قات؟ ولا ربنا فتح عليها دلوقت. وبتضرب بانجو؟!
= الحاج عبده الأزهرى وزير الثقافة على ما تفرج، قال لافض فوه.. ومات حاسدوه: السنوات الأربع الماضية لن تذكر فى التاريخ فى أكثر من نصف سطر!! يعنى ربع سطر لثورة 25 يناير، وربع سطر لثورة 30 يونيو !! يا جبروتك يا أخى.
- وكاتم كل ده فى نفسك يا ضنايا؟! عموما .. أعمل بنظرية الملوانى.. كل ما تتزنق.. أقلع.. خاصة أن الثقافة يتنقض الوضوء.
= الدكتورة هالة مصطفى وزيرة الاسكان.. ربنا نفخ فى صورتها.. واداها الصحة والعافية، وأطلقت نظرية عبقرية، لا نظية حنفى بتاع نورماندى تو، تؤكد أن «الشباب كسلان وقاعد على القهاوى يندب حظه».
- مش أحسن ما يبقوا ناشطين ، ويقعدوا على البرش.. عموما.. خالتى مارى منيب بتسلم عليكى وبتقولك: أنت جايه تشتغلى إيه؟!
= وزارة الاوقاف اتقفت مع السلفيين بتوع مناخيره بنى، على مهاجمة الاعلاميين، الذين ينتقدون كتب التراث المقدسة فى خطبة الجمعة. وعلى رأى سيد درويش اقرأ يا شيخ قفاعة.. كتب تراث الساعة .. اللى فى جورنال البرص.. وانا ابقى أحلق دقنى. أن ما كنتش ترقص.. ترقص ترقص