ضد المنطق.. بنت شمال

إيه هو مفهوم الشمال من وجه نظر أى راجل وهل كلمة شمال دي بتنطبق فقط على البنات ولا بتنطبق كمان على الرجالة

بنت شمال دي ليها تفسيرات كتير من وجه نظر الرجالة

أحيانا بتتقال على البنت إللى بتوافق تخرج وتسهر معاه حتي لو خرجت بأحترام وماحصلش بينهم أى حاجة خارجه عن نطاق الأحترام

وأحياناً بتتقال على البنت إللى بتوافق أن يبقى فيه بينها وبين الولد علاقة جنسية سواء كاملة أو غير كاملة

ليه الراجل شايف أن من حقه أنه يرتبط بواحدة ( لأنها من وجهة نظره محترمة ) ويعرف واحدة تانية عليها ( وده لأنها من وجهة نظره شمال ) وده بيديله الحق طبعاً أنه يُقيم معاها علاقة جنسية سواء كاملة أو غير كاملة

الغريب أن الراجل من دول معتبر أن البنت هي إللى شمال ومش شايف نفسه أنه هو كمان شمال ( ماهو مش قديس يعنى وقاعد يصلى بيها )

البنت الشمال دي يوماً ما كانت محترمة فى عيون الرجالة لحد ماجه واحد حولها لشمال بس هو شخصياً ماشافش نفسه أنه شمال أكتر منها

ليه الراجل ما بصش أن البنت الشمال دي هو معاها بيكون شمال أكتر منها ماهي مش شمال لوحدها ده لو كانت هي فعلاً شمال زي ماهو بيقول

الراجل شايف أن ليه إحتياجات ومن حقه أنه يشبعها وأى بنت شمال هتفى بالغرض ده وأنه لما يفكر يتجوز هيتجوز واحده محترمة ماتعرفش السكر من الملح وفى الغالب البيه ده بيضحك عليه لأن إللى فاكرها مابتعرفش السكر من الملح بتطلع عارفة أكتر من إللى هو ممكن يكون عارفة ( بس هي عرفت تضحكك عليه وتوريه إللى هو عايز يشوفه وبس أصل ربنا بيسلط أبدان على أبدان وبيأخد الحقوق على طول لأنه عادل ومابيرضاش بالظلم أبداً وزي ما ضحك على واحدة جت إللى تضحك عليه ماهو كأس وداير على الجميع )

أحنا فى مجتمع بيسمح للراجل بكل حاجة وبيحرم على الواحدة كل حاجة
ونسي أن الدين بيعاقب الراجل والست بنفس المكيال ومش بيكيل بمكيالين
عند ربنا أنت شمال زي ماهي شمال وأنت هتاخد نفس العقاب إللى هي هتأخده بس أحنا مجتمع بيقدس تقاليده وأعرافه أكتر ما بيقدس الدين وبيهمه المجتمع هيقول إيه أو هيعمل إيه أكتر ما بيهمه ربنا هيحاسبه إزاى

ياعزيزى أنت شمال زي ماهي شمال بل أنت شمال أكتر منها كمان وأي كلام تانى يبقى ضد المنطق