خبط بالعقل.. ربنا يكفينا الشر.. «وجبة فاسدة لكل صائم» في العراق.. والفاعل منظمة قطرية

شاهد فض رابعة: كان فيه ممرات آمنة لخروج المعتصمين
هو فض رابعة والنهضة كان من امتى؟.. استني لما أدور كدة.. ياااه ده من 2013 يعني من حوالي 4 سنين.. طب هما إيه اللي فكرهم بيه مش حصل الفض بقى وكدا.. آه بس في اتهامات كتير إن الشرطة قتلت من الإخوان كتير ودا كذب طبعا.. اتصيت في نظري انهاردة كدا بالخبر دا.. شاهد فض رابعة: كان فيه ممرات آمنة لخروج المعتصمين.. يعني من الآخر كدا الإخوان كانوا بيتلككوا عشان يتقتلوا.. بس خلاص..
قانون «كوفيفي».. مقترح لاعتبار تغريدات «ترامب» تصريحات رسمية
تقريبا الرئيس الأمريكي «ترامب» عايش علي السوشيال ميديا زينا كدا.. راجل بسيط والله ومتواضع سايب حكمه للدولة العظمة وقاعد على الفيس وتويتر.. المهم بقى أنه بيكتب كلام زي الفل على تويتر فاقرروا في أمريكا أنهم يعملوا قانون «كوفيفي» عشان تغريدات «ترامب» تبقي تصريحات رسمية.. شوفت الهنا..
الصحة: إغلاق بنكين للدم بدون ترخيص وجناح للعمليات.. في حملة مكبرة على 7 مستشفيات خاصة بزراعة الأعضاء
والحمد لله وزارة الصحة بدأت تفوق وتفهم إن في أرواح هي مسئولة عنها.. الصحة انهاردة قامت بإغلاق بنكين للدم بدون ترخيص وجناح للعمليات في حملة مكبرة على 7 مستشفيات خاصة بزراعة الأعضاء.. شكلنا كدة داخلين علي الإحساس بالأمان وإعادة الثقة في منظومة الصحة.. ربنا يستر..

«وجبة فاسدة لكل صائم» في العراق والفاعل منظمة قطرية
لما كنا بنقول انتم دين أبوكم إيه؟.. الناس بتزعل بس لما نلاقي إن القصة مش قصة إرهاب وبس دا مخطط للقضاء على البشرية يبقى لازم نقف وقفة كبيرة.. «وجبة فاسدة لكل صائم» منظمة قطرية إرهابية ترتكب جريمة على أرض العراق مصرع نازحين وإصابة 800 آخرين جراء تناولهم طعام فاسد شرق الموصل ونقل 100 مصاب إلى مستشفيات أربيل والبرلمان العراقي يحقق في الواقعة.. تخيل بقى لما الأخ بيقتل في أخوه.. حسبي الله ونعم الوكيل..
7 نصائح لتحمي عينيك من الجفاف في رمضان
نصيحة علي الماشي..عنيك تعبانة في رمضان؟.. وعندك جفاف وكدا فيها.. هنقولك الحل.. اشرب كمية كبيرة من الماء لترطيب الجسم والعينين.. تناول الخضروات والفاكهة خلال وجبة الإفطار.. تجنب العمل فترات طويلة أثناء الصيام أمام شاشات الكمبيوتر.. ارتدى نظارة شمسية أثناء الخروج في النهار.. تجنب التعرض للشمس نهائيا في فترة الصيام.. إذا كنت تعانى من حكة شديدة في العين استخدم قطرة مرطبة.
اقرأ أيضا:
خبط بالعقل..الشيخة "موزة" القطة هتاكل عيالها.. كوبر مدرب "فتة".. 2030 مصر الأقوى اقتصاديا.. لية لازم نتستني المصيبة؟