غلوشيات رمضانية #14 رمضان.. يكتبها عبدالله غلوش: أفراح القبة.. جرأة صابرين تخطت فكرة استبدال الحجاب بالباروكة بمراحل..والأسطورة .. آخر مرة شفت فيها دنيا عبدالعزيز بتمثل كويس كان في «عائلة ونيس»

#14رمضان
-مش عارف مين اخترع فكرة ان اسم البطل التاني للمسلسل يتكتب قبل اسم المخرج عشان مايتقمصش؟
-الأسطورة .. بعد منافسه شرسه مع " افراح القبة والخانكة و ازمة نسب" ، اقدر اقول بقلب مطمئن وضمير مرتاح ، انه المسلسل رقم 1 في اكبر عدد من " يا روح أمك " في دراما هذا العام.
-الأسطورة .. اخر مرة شفت فيها دنيا عبدالعزيز بتمثل كويس ، كان في الجزء التاني من "عائلة ونيس".
-الأسطورة .. لو محمد رمضان كان داخل ب 2 كيلو برتقال ، كان هايبقي رد فعل مي عمر وفردوس عبدالحميد ، علي خروجه من السجن أفضل من كده.
-الأسطورة .. صدمة عايدة رياض في جوزها "زكريا العايق" ، مش أد صدمتي لما شفته الصبح في فقرة "اسأل طبيبك" علي قناة ten وعرفت انه واحد من اكبر دكاترة السكر والغدد الصماء في مصر.
-طالما الأزهر منح رخصه للاعيبه عشان تفطر ، يبقي ياريت نقول للزمالك مبروك من غير ما نتبعها بأي مبررات.
-أفراح القبة .. بدأت أزهق من كمية الفلاش باك المبرر والغير مبرر في المسلسل.
-أفراح القبة .. جرأة صابرين تخطت فكرة استبدال الحجاب بالباروكة ، بمراحل.
- أفراح القبة .. هو في امكانية نشوف مني زكي مرة تانية في المسلسل ، ولا نعمل حسابنا علي فيلم " من 30 سنة" في العيد"؟
-للسنة الثالثة علي التوالي ، تحية من القلب للمخرج اللي بيختار الموديلز في اعلانات يونيفرسال.
-سقوط حر .. بعد كل السنين اللي غابتها ، كنت متوقع عودة اقوي من كده لوفاء صادق.
-سقوط حر .. اول ما شفت عزة بهاء وهي بتزعق لبنتها ، افتكرتها علي طول وهي بتقول لعادل امام في "الواد سيد الشغال" ، انت شديد اوي مع الموظفين بتوعك.
-سقوط حر .. والله ما كان هايجري حاجة لو نيللي كريم كانت قتلت ظافر عابدين في نهاية "تحت السيطرة" ، وكانوا عملوا جزء تاني من المسلسل احسن.
-سقوط حر .. فريال يوسف عندها قدرة غير عادية بعد كل مشهد بتظهر فيه ، انك تلاقي نفسك تلقائيا بتدعي علي اللي خلاها هي ودرة يمثلوا في مصر.
-اوصيكم ونفسي في النصف الثاني من رمضان ، بضرورة الانتباه إننا لسه داخلين علي كحك وفسيخ وبيتي فور.
-مأمون وشركاه .. خايف بعد المسلسل ما بدأ يحلو ، خالد سليم يجي يقفلني منه مرة تانية.
-مأمون وشركاه .. مشهد امن الدولة في حلقة امبارح صورة بالكربون من نفس المشهد في فيلم "عريس من جهة امنية" ، ومشهد تمارين زوجة ابنه الإيطالية منحوت من مشاهد نيكول سابا في " التجربة الدنماركية".
-فوق مستوي الشبهات .. عبدالله حسن وأمين جمال .. مكسب كبير لكتابة السيناريو في مصر.
-فوق مستوي الشبهات .. نفسي اعرف باسل الزارو وهو بيتفرج علي ماتش بتروجيت والانتاج الحربي ، كان بيشجع مين؟
-نيللي وشيريهان .. اخر حاجة كنت ممكن اتخيلها ان عم دهب بعد كل العمر ده يطلع في الاخر محمود الجندي.
-الخانكة .. كنت منتظر ان احمد الشامي "واما" يكون مشارك في المسلسل عشان يعرفنا انه بيعرف يمثل ، مش يعرفنا انه بيشرب مارلبورو أحمر.
-معيارك في الحكم علي الدكتور اللي عيادته علي اخرها ، او الميكانيكي اللي ورشته مافيهاش مكان لعربية ، هو عالجك صح وصلحلك عربيتك كويس ولا لأ ؟ .. اتمني نتعامل مع بيومي فؤاد بالمنطق ده.
-ماليش إيد بتوجعني عشان حد يمسكني منها وعيني من إزاز عشان حد يكسرها .. يوسف الشريف "القيصر".
-الجنة مش بيدخلوها باللبس ، بيدخلوها بالمعاملة والكلمة الطيبة والوش البشوش .. لبلبة "مأمون وشركاه".
-يابنتي افتحي الكباريه بتاع امك الله يرحمها ، ماتقطعيش عيش البنات ، وتحمليها ذنوب أكتر من كده .. يحيي الفخراني "ونوس".
-عائلتك هي الشئ الوحيد الصادق الذي سيبقي معك حتي النهاية ، لا تنخدع بزحمة العلاقات .. احمد الشقيري "قمرة".
-ربنا يرحمك يا أمي ويرحم امهاتنا جميعا ويخلي امهاتكم يارب.