غلوشيات رمضانية #8 رمضان.. يكتبها عبدالله غلوش: أنا لو مكان رئيس جهاز حماية المستهلك احترم نفسي واستقيل.. في يوم واحد روجينا اتطلقت في «الطبال» واترملت في «الأسطورة».. كفاية قلش علي اغتيال «الدسوقى»

#8رمضان
-في يوم واحد، روجينا اتطلقت في "الطبال" واترملت في "الاسطورة".
-الحقيقة الواضحة في رمضان السنة دي ، ان مصر مافيهاش نجيب محفوظ ولا أسامة انور عكاشة تاني.
-اذكر كام مرة فكرت تجيب فيها قناة ten من اول رمضان؟
-ياريت يا جماعة اللي عايز يمدح حد يمدحه من غير mention ، انت المفروض بتقول رأيك فيه لوجه الله أولأنه يستاهل المدح فعلا، مش عشان تعرفه انت كاتب ايه عنه وتعرف الناس انه عندك في ال friend list.
-سقوط حر.. المسلسل الأبطأ في رمضان.
-سقوط حر.. "انتي معانا هنا ولا مع الأسف".. سلوي عثمان لما تحب تقلش.
-سقوط حر.. أول مرة اشوف سواق ميكروباص يتضرب، وياخد عربيته ويمشي عادي كده.
-سقوط حر.. مشوفتش ممرضات في مستشفي حكومي بالطيبة دي من ايام المرحومة أمينة رزق.
-سقوط حر.. صفاء الطوخي كانت عاملة محشي لأدم، وعملت لنفسها كفته ومكرونة سباجتي.
-للسنة التانية علي التوالي، النسخة ال 3D من بكار حاجة تسد النفس .. ربنا يرحمك يا دكتورة مني ابوالنصر.
-مأمون وشركاه.. الظهور الأول لشريف عامر في الدراما السنة دي.
-في نفس اليوم اللي يوسف الشريف هرب فيه من السجن في القيصر ، بيومي فؤاد دخل السجن في نيللي وشيريهان.
-الاخوة اللي بتعمل شير لأي حاجة، علي فكرة شاي ليبتون الاحمر هو نفسه شاي ليبتون الأصفر، بس مغيرين لون العلبة، وماعتقدش ان تغيير لون العلبه ده بيجيب سرطان.
-أحمد السعدني رائع في وعد، وهايل في أفراح القبة.
-كفاية قلش علي حادثة اغتيال رفاعي الدسوقي.. ونراعي حرمة الموت شوية.
-فوق مستوي الشبهات.. تخيل في كام واحد وواحده حواليك بيعملوا فيك زي يسرا ما بتعمل مع شيرين رضا كده.
-إعلان مستشفي القلب.. مجدي يعقوب ياخوانا ياخوانا.
-إعلان مستفي القلب.. صوت حماقي وصورة حازم امام بجوار حسام غالي ، احلي حاجة في الاعلان.
-إعلان مستشفي القلب.. ياريت دنيا سمير غانم تنصح الأخ مادي بأنه يكتفي بالتلحين والتوزيع بس لأن صوته وحش.
-إعلان مستشفي القلب.. اسعاد يونس افضل من طلتها في اعلان فودافون.
-إعلان مستفي القلب.. نيللي كريم ضحكت اخيرا.
-ونوس.. لما يكون كل الممثلين هايلين ومحطوطين في ادوارهم صح .. يبقي شادي الفخراني هو البطل الحقيقي للمسلسل.
-رأس الغول.. ايه قيمة اني اتفرج علي مشهد مطارده اكتر من 6 دقايق بين المتهم مصطفي ابوسريع وظابط الامن الوطني رامي وحيد، طالما اتقبض عليه في الاخر.
-أنا لو مكان رئيس جهاز حماية المستهلك احترم نفسي واستقيل.
-يونس ولد فضة.. 3 حلقات بدون حدث واحد جديد او مفيد.
-كل ما تنجح، كل ما هتلاقي اللي يتمني لك الفشل والخسارة .. سناء شافع "الميزان"
-تحت القبة رقاصة ولاموأخذة قرني.. سيد رجب "افراح القبة".
-للي يخبي علي مراته انه عنده الفلوس دي كلها أسوأ من اللي يتجوز عليها.. لبلبة "مأمون وشركاه".
-ربنا يرحمك يا أمي ويرحم امهاتنا جميعا ويخلي امهاتكم يارب.