غلوشيات رمضانية #7 رمضان.. يكتبها عبدالله غلوش:عيب أوي بعد كل ده لما الرئاسة تعمل إفطار الأسرة المصرية امبارح ماتكونش بين الحضور الحاجة زينب.. رمضان وبنات اليورو .. دونت ميكس

#7رمضان
-عيب اوي بعد كل ده ، لما الرئاسة تعمل افطار الأسرة المصرية امبارح ، ماتكونش بين الحضور الحاجة زينب.
-الدرس المستفاد من اول اسبوع في رمضان ، حبوا ولادكم وصاحبوهم وماتفرقوش بينهم في المعاملة ، عشان مايبقوش زي نيللي كريم ويسرا وغادة عبدالرازق.
-اضعف اسكتش في برنامج ابوحفيظة ، اجمد من الاعلان اللي عمله اكرم حسني مع احمد فهمي لشركة orange.
-افراح القبة .. المفروض القنوات من امبارح كانت تكتب +18 ، او للكبار فقط قبل عرض حلقات المسلسل.
-افراح القبة .. بدل رقص صافينار في "ابوالبنات" محتشمه اكتر من بدل رقص رانيا يوسف.
-الواحد لو وكيل نيابه اساسا ، مش هايعرف يركز في كمية جرايم القتل الموجودة في الدراما السنه دي.
-سقوط حر .. نيللي كريم في مشهد جلسه الكهرباء .. كورس جديد في التمثيل.
-سقوط حر .. صفاء الطوخي عملت علي الغدا النهارده سلطة وفراخ مشوية.. واضح انها بدأت دايت.
-جهاز حماية المستهلك النهارده فكرني بغرفة صناعة الاعلام لما حبت توقف شوبير والابراشي ، والقنوات قالت لها قرارتك مش ملزمة.
-فودافون راعي الاهلي لما حبت تعمل اعلان جابت السقا ومنه شلبي وشريف منير وشيرين واسعاد يونس وحكيم والعسيلي وسمير غانم واشرف عبدالباقي .. عبور لاند راعي الزمالك مقدرتش تجيب اكتر من احمد فتحي وحسن الرداد .. (احمد الطيب ستايل).
-فوق مستوي الشبهات .. يسرا قفلت عداد الشر.
-فوق مستوي الشبهات .. اخر حاجه كنت اتوقعها ان حماة نجلاء بدر بتعرف تتكلم فرنساوي.
-رمضان وبنات اليورو .. دونت ميكس.
-ميريهان حسين عاملة دور ريهام سعيد في "الخانكة" .. وشيري عادل بتقلش علي ريهام سعيد في " بنات سوبر مان".
-لما تقرا خبر علي موقع معين ان المسلسل الفلاني حقق نسب مشاهدة تاريخية ع اليوتيوب ، وتكتشف ان المسلسل مش بينزل علي اليوتيوب اساسا ، نصيحة ماتقراش اي خبر عليه مرة تانية.
-اغنية اعلان شركة زين السعودية بصوت سعد المجرد ، الأفضل بعد أغنية اتصالات بصوت أصالة.
-نيللي وشيريهان .. كليب فرح بيومي فؤاد وسلوي خطاب .. كما لم تضحك من قبل.
-نيللي وشيريهان .. محمد سلام متوفق علي نفسه.
-اللهم ارزقنا قدرة محلات الحلويات علي الإبتكار في رمضان.
-صدي البلد بتحط علامه مائية علي مسلسلاتها اللي مفيش ولا واحد فيهم حصري عشان محدش يسرقها .
-براعة سوسن بدر في جراند اوتيل وافراح القبة ويونس ولد فضة ، مش كفاية عشان نسامحها علي الدور اللزج والسمج اللي بتعمله في مسلسل "بس مباشر" مع طلعت زكريا ومها احمد.
-حاولت اقنع نفسي وانا بسمع "ثلاثي اضواء الراديو" علي 9090 انه المفروض مسلسل كوميدي ، ومعرفتش.
-لو بنصرف فلوس باقات الانترنت علي ولادنا كان زمانهم أجدع من بيل جيتس.. عمرو سعد " ولد فضة".
-البلد دي بتتلكك عشان تتقسم .. في الكورة ، السياسة ، الدين ، حتي في البيت مفيش واحد ومراته مش متخانقين .. عادل امام "مأمون وشركاه".
-اللي يقف معاك في فرحتك ممكن يبيعك في شدتك ، لكن اللي يقف معاك في شدتك هايفضل معاك ليوم دفنتك.. حمزة العيلي "7 ارواح".
- علي فكرة يا بابي ، وليه دي كلمة naughty .. جني محمد "ابوالبنات".
-ربنا يرحمك يا أمي ويرحم أمهاتنا جميعا ويخلي أمهاتكم يارب.