شهداء ثورة مصر لشعبها : خافو على مصر واقتلوا الفتنة.. سايبينها أمانة في إيديكو

نشر نشطاء على موقع اليوتيوب مقطع فيديو بعنوان “رسالة من شهداء ثورة مصر”, وتضمن الفيديو رسالة تخيلية من شهداء الخامس والعشرين من يناير للمصريين تحضهم على وأد قتل الفتنة والخوف على مصر.
وقال الشهداء خلال الفيديو إنهم تركوا مصر أمانه في أيدي المصريين بعد أن ضحوا بدمائهم من أجل أن تعيش مصر وشعبها في حرية وحب وكرامة.
ويبدأ الفيديو بكلمة من الشهيد أحمد بسيوني الذي يقول في الفيديو ” أنا الشهيد أحمد بسيوني.. ضحيت بكل حاجه في حياتي.. بزوجتي وأولادي وأمي وأبويا، عارفين علشان خاطر أيه .. وعشان خاطر مين.. عشان خاطر البلد دي وعشان خاطركو أنتو يا شعبي.. يا إخواتي..عشان تعيشوا في امان وحب وحرية.. زعلت اوي لما شفتكو بتقتلو بعض”. ويضيف قائلاً “عارفين خايف من أيه .. خايف أندم إن دمي نزل على ارض مصر .. وخايف اندم إني مت عشان مصر.. او مت عشانكو.. لإني حاسس إنكو مقدرتوش دي”، ويؤكد خلال الفيديو “أنا مت عشان خاطر كل مصري”, ويمضي قائلاً: “عشان خاطري وعشان خاطر كل شهيد حبو بعض.. خافو على بعض.. أمسكوا في ايد بعض.. متدوش فرصة لعدونا يفرح فينا.. وأنا متأكد إنكو هتعدو المحنة دي.. ومتأكد أن دمي مش هيروح هدر.. وعارف أني انا وكل الشهداء غاليين عليكو .. اوعدوني تنسوا الفتنة دي وتحرقوها .. وتقتلوها هيه.. الفتنة ديانة كل اللى مابحبش مصر.. عشان كده اثبتوا للعالم إحنا قد ايه بنحب مصر.. وإحنا مصريين وبس.. وميدان التحرير شاهد علينا .. لو بتحبو مصر خافو على بعض” .
وقال الشهيد مصطفى الصاوي: “أنا أسمي الشهيد مصطفى الصاوي.. ضحيت بشبابي ومستقبلي عشان خاطركوا.. وأنا بموت كنت فرحان اوي وانا شايفكو في الميدان بتحبوا بعض .. حاضنين بعض .. وانا بموت كنت مطمن عليكوا.. لإنكو كنتو بجد خايفين على بعض، لكن دلوقتي دلوقتي خايف وحزين على إللى انا شفته.. مش ممكن نوصل أبدا للمرحلة دي.. اوعدوني متخلوش الفتنة أبدا بينا.. عشان خاطري وعشان خاطر كل شهيد توعدوني تحبو بعض من قلبكو ” .
ويضيف صانع الفيديو على لسان الصاوي قائلاً “أيه رأيكو لما ننسى كلمة مسملين ومسيحيين.. ويبقى اسمنا بس مصريين.. أنا عن نفسي موافق.. عشان بحبكوا وخايف عليكوا وخايف على بلدى مصر .. مستنيكوا توعدوني عشان أنام في قبري وأنا مرتاح ومطمن عليكوا وعلى بلدى لو بتحبو مصر خافو على بعض ” .
أما الشهيد محمد هديه فيقول على لسانه صانع الفيديو في الرسالة التخيلية لشهداء الثورة : ” أنا أسمي الشهيد محمد سعيد هدية وكنت فعلا هدية من مصر لشعبها عشان تنول الحرية.. وعشان إخواتي المصريين يعيشوا بكرامة .. لكن اللى شوفته النهارده بيقولي إن شعبي مش قابل الهدية دي.. معقول نقتل بعض.. ده انا ضحيت بحياتي ومستقبلي.. حتى ضحيت بصحابي اللى في المدرسة عشانكو.. تيجو في الآخر وتتخانقوا.. وتقتلوا بعض .. أنا زعلان أوي.. وبدعي ربنا تحبوا بعض.. يا أغلى ناس ليه في الدنيا ديه .. لو بتحبوا مصر .. خافوا على بعض ”
وفي ختام الفيديو يظهر صوت يعدد أسماء الشهداء مع عرض صورة كل شهيد.. وقال المتحدث : “أنا الشهيد كريم بنونة ..وأنا الشهيد أحمد دياب, وأنا الشهيد حسين طاهر.. وأنا الشهيد عمرو غريب, وأنا الشهيد سيف الله مصطفى، وأنا الشهيد محمد محروس، وأنا الشهيد محمد عماد حسين، وصوت يقول انا الشهيد محمد راشد، وأنا الشهيد محمد عبد المنعم، وأنا الشهيد إسلام رأفت، وأنا الشهيد إبراهيم عبد الستار, وأنا الشهيد محمد سليم, ثم يظهر صوت يوجه رسالة للمصريين جميعا يقول : ” كلنا وأكتر من 300 شهيد .. وبصوت واحد بنقولكوا .. لو بتحبوا بعض خافوا على مصر .. إحنا سايبين مصر أمانة في إيديكو” .
شاهد الفيديو: