غلوشيات رمضانية #5 رمضان.. يكتبها عبدالله غلوش: شرابات غادة عبد الرازق الابرز في «الخانكة» .. «المغني» المسلسل وحش اوي يا عب حميد.. بمناسبة اليورو بلجيكا فوق الجميع

#5 رمضان
- سقوط حر : الفرق الوحيد بين حلقه النهارده وامبارح ، ان صفاء الطوخي كانت عاملة النهارده ملوخية و رز علي الغدا وامبارح كانت عاملة بامية.
- سقوط حر : من مشاكلي مع المسلسل ان ادم ابن نيللي فيه شبه من احمد وفيق اكتر من نيللي وابوه اللي اتقتل.
- سقوط حر : فريال يوسف لا طعم ولا لون ولا اي حاجه.
- الاسطورة : الاهم من عودة فردوس عبدالحميد وهادي الجيار ، عودة جليلة محمود.
- الاسطورة : مشهد خناقة محمد رمضان ومحمد عبدالحافظ .. اخراج وتنفيذ هايل.
- لو سمعت اي حلقة من مسلسل قصة حياة حمار علي نجوم fm ، اكيد هتلاقي نفسك في جزء منه.
- ماونتن فيو : يعني الناس تقف طوابير قدام مقر الشركة في سيتي ستارز من 6 الصبح ، عشان في الاخر تدفعوا فلوس مقدم الحجز علي اعلانات رخمة زي بتاعة عز والكدواني دي؟
- خالد النبوي مدمن ترامادول في 7 ارواح ، وعفاف شعيب مدمنة ترامادول في الكيف.
- فوق مستوي الشبهات ، يسرا واقفه قدام مستشفي زايد التخصصي علي اساس انها في ميدان الرماية.
- فوق مستوي الشبهات : مراد مكرم بيعيد اكتشاف نفسه كممثل.
- فوق مستوي الشبهات : شيرين رضا اقرب مثال للست المصريه في الدراما السنه دي.
-جراند اوتيل : انوشكا تحسها اصلا من الزمن اللي بيحكي عنه المسلسل.
- الشئون المعنوية تتمني لكم صوما مقبولا وافطارا شهيا .. جملة هاتسمعها علي جميع المحطات الإذاعية الحكومية قبل اذان المغرب.
- عزومة واحده كفيله انها تدمرلك خريطتك الرمضانية بالكامل.
- محمود عبدالعزيز ويحيي الفخراني ، اكبر من اننا نوصف ادائهم التمثيلي بعد كل الزمن ده.
- بمناسبة اليورو ، بلجيكا فوق الجميع.
- المغني .. المسلسل وحش اوي يا عب حميد.
- الجميل ان في ممثلة او تقريبا كانت ممثلة لان بقالي اكتر من 3 سنين مش بشوفها بتمثل ، بتشتم برنامج رامز كل يوم برغم انها قبل رمضان بأسبوعين بس والله كلمتنا تقولنا انا زعلانه منكم عشان مش بتجبوني في البرنامج.
- المشكلة اني خايف انصح امير كرارة يخرج من عباية ادوار العشوائيات والبلطجة اللي عايش فيها ، لانه لما حاول يخرج في مسلسل " انا عشقت " فشل.
- الميزان : احمد فهمي افضل من مقدمين توك شو كتير علي الفضائيات الان.
- بس تصدقي جلال الذكي كيوت اكتر من باسل الخياط وظافر العابدين في دور الظابط .. حوار بين بنتين في واحد من كافيهات اركان منذ قليل.
- مطبخ الست غالية ..الحاجة الوحيدة اللي ممكن تشوفها علي القاهرة والناس في رمضان.
- اعصر علي نفسك لمونه وحاول تتفرج علي حلقة من مسلسل لطيفة " كلمة سر" وصدقني مش هاتكررها تاني.
- شرابات غادة عبدالرازق ، الابرز في اخر حلقتين من الخانكة.
- ربنا يرحمك يا أمي ويرحم امهاتنا جميعا ويخلي امهاتكم يارب.