غلوشيات رمضانية ..يكتبها عبدالله غلوش: ليلى علوي مخطوبه لأحمد سعيد عبدالغني .. وابن ماجد المصري يغتصب غادة عبدالرازق

#3رمضان
- مني زكي بتحب محمد الشرنوبي .. ليلي علوي مخطوبه لاحمد سعيد عبدالغني .. روجينا متجوزه محمد رمضان .. نجلاء بدر مصاحبه احمد حاتم .. ابن ماجد المصري اغتصب غادة عبدالرازق .. اظن مفيش دليل اوضح من كده ان 2016 هو عام الشباب المصري.
- محمد منير تشتري له البوم .. تروح له حفلة .. تتفرج له علي كليب ، انما تتابع له مسلسل صعب.
- قارن بين عدد الاعلانات في برنامج الصدمة والاعلانات المعروضة في أي برنامج او مسلسل تاني ، وهاتعرف شركات الاعلانات في مصر بتفكر ازاي؟.
- معرفش ليه مش بقتنع بفكرة إذاعة برامج عن الاكل والطبخ علي الراديو.
- جراند اوتيل .. هي ثورة 52 قامت ليه؟
- جراند اوتيل .. عمرو يوسف الأضعف بين نجوم المسلسل.
- جراند اوتيل .. من المرات النادرة اللي احمد داوود يطلع فيها ابن ناس.
- جراند اوتيل .. ساعات كتير تحس انك بتتفرج علي النسخة المصري من تايتانيك.
- جراند اوتيل .. ياسمين القاضي مصممة الملابس .. ياسمين مختار makeup artist .. مجدي خلف الكوافير .. الأبطال الحقيقين للمسلسل.
- شابوه لكل واحد افتكر مقولة محفوظ صابر وزير العدل الأسبق الخالدة "ابن عامل النضافة ماينفعش يبقي قاضي" وهو بيتفرج علي حلقة امبارح من الأسطورة.
- "سقوط حر" .. "مش عايزين الظرف اللي احنا فيه يخلينا نفسد اخلاق الولد او نبوظه" .. صفاء الطوخي موجهة حديثها لأحمد وفيق عشان جاب Ipad لابن نيللي كريم.
- الخانكة .. عودة فتحي عبدالوهاب واغنية التتر بصوت بوسي .. احلي ما في المسلسل حتي الان.
- "سيد أندرويد" علي cbc .. كارتون موجه لأطفال العشوائيات.
- رغم رخامة معظم حلقاته السنة اللي فاتت ، بس بصراحة الكبير وجوني وحزلقوم كانوا عاملين لرمضان طعم تاني.
- 7 ارواح .. في اول 3 حلقات 2 ماتوا ورجعوا صحيوا مره تانيه.
- ولد فضة .. ريهام حجاج بالصعيدي ، حاجة تفرح.
- اعلان "تحيا مصر" بتاع حلق الحاجة زينب .. من اجمل حملات التبرعات السنة دي.
- يوم المشاهد العبقرية .. ديالوج الفخراني والحلفاوي في ونوس .. محمد رمضان وأهل تمارا في الأسطورة .. ليلي علوي وضميرها خالد الصاوي في "هي ودافنشي" .. اياد نصار وجثة مني زكي في "أفراح القبة".. انهيار نيللي كريم في صالة الطعام بمستشفي العباسية " سقوط حر".
- بنات سوبر مان .. عودة الألش الجميل.
- أزمة نسب .. حد يقول لمحمود عبدالمغني ان طريقة التمثيل دي انتهت بقالها شويه حلوين.
- ايه لازمة أفيه "خلصنا يا استاذ ، لأ لسه يا حبيبي" في نهاية اعلان اورانج؟
- خالد سرحان .. المادة الخام للأفورة.
- اللي زعلانين ان معظم المسلسلات بتناقش جرايم وقضايا القتل ، امبارح راجل حدف مراته من الشباك في دمياط عشان نسيت تحضر له السحور ، والنهارده الصبح واحده قتلت جوزها بسكينة المطبخ عشان مش عايز يزود لها المصروف.
- ربنا يرحمك يا أمي ويرحم أمهاتنا جميعا ويخلي امهاتكم يارب.