غلوشيات رمضانية #9 رمضان.. يكتبها عبدالله غلوش: خير اللهم أجعله خير.. أسبوع كامل مر من غير أبوهشيمه ما يشتري أو يستحوذ علي قناة أو شركة جديدة.. القيصر.. أحمد نادر جلال غلطة الشاطر بألف

#9رمضان
-بناء علي فتوي الشيخ احمد كريمة بأن افطار المقيمين فى اكتوبر والشيخ زايد على اذان القاهرة غير جائز، يبقي النهارده أول يوم صيام بالنسبة لي.
-اعلان مستشفي القلب .. الأهم من اللايك والشير ، انك تتبرع للمستشفي ولو حتي برسالة.
-اخر حاجة كنت ممكن اتوقعها ان شيري عادل وريهام حجاج يبقي دمهم اخف من علي ربيع وأوس أوس.
-Hنا وبابا وماما .. المسلسل الوحيد اللي قناة الحياة عملت له اعلانات في الشوارع وبروموهات في التليفزيون ، مع انها مابتعرضوش اصلا.
-عائلة رمضان كريم .. كارتون واقعي ودمه خفيف وبيسخر من مشاكلنا وطريقة تربية لأولادنا بطريقة شيك ومحترمه.
-مع كامل احترامي وتقديري لصبري فواز وموهبته ومحبيه ومُريديه ، بس لا دوره في "افراح القبة" ولا في "الميزان" فيهم ابداع غير عادي أو اضافة قوية ومايوصلوش لنصف اللي قدمه السنة اللي فاتت في مسلسل " بين السرايات " علي سبيل المثال.
-ميكروسوفت اشترت موقع LinkedIn ب 26 مليار دولار ، واحنا لسه بنعمل اعلانات عن تمويل مشروعات الزارير والبراميل.
-الميزان .. أحمد فهمي فسخ خطوبته ، وغادة عادل طلبت الطلاق.
-مأمون وشركاه .. لما يوسف معاطي مايعرفش انه مفيش حاجة اسمها ان البنك يكشف الحسابات السرية للعملاء بتوعه ، يبقي يحمد ربنا أن بنك مصر اكتفي ب " بيان الإعتذار" اللي اتكتب في بداية حلقة النهارده ومصعدش الأمور أكتر من كده.
-مأمون وشركاه.. شريف عامر ظهر في حلقة النهارده اكتر من عادل امام.
-مأمون وشركاه.. كنت متوقع أن الدولة مش هاتسيب مأمون لغاية ما يتبرع لصندوق تحيا مصر.
-سقوط حر .. اقوي حلقات صفاء الطوخي من اول رمضان .. احتمال عشان معملتش أكل النهارده.
-سقوط حر .. فريال يوسف "بيسيكاتريست" .. كلاكيت تاني مرة.
-سقوط حر .. فريال يوسف نايمة full makeup.
-كان عندنا قناة اسمها موجة كوميدي للأسف.
-الأسطورة .. اغنية راح بصوت احمد باتشان من اجمل الاغاني في مسلسلات السنة دي.
-الأسطورة .. واضح ان مشكلتنا مع تمثيل فردوس عبدالحميد، كان سببها الأستاذ محمد فاضل.
-الأسطورة .. يارب الأردني وائل نجم يبقي امتداد لإياد نصار مش منذر رياحنه.
-خير اللهم اجعله خير .. اسبوع كامل مر من غير ابوهشيمه ما يشتري او يستحوذ علي قناة أو شركة جديدة.
-القيصر .. احمد نادر جلال ، غلطة الشاطر بألف.
-أفراح القبة .. اغنية "حبك شمعة وقلبي فانوس" أجمد من رقصة مني زكي ورانيا يوسف.
-أفراح القبة .. صلاة سوسن بدر وبناتها خلف احمد السعدني ، اقوي مشهد في دراما رمضان حتي الان.
-الخروج .. أبسط دليل علي أن الشحات مبروك بيمثل احسن من ظافر العابدين.
-حتي الان ، مش لاقي تفسير لوجود شكر خاص علي تتر "الاسطورة" للدكتورة صبورة السيد والدة المخرج محمد سامي ، ولا لاقي سبب لوضع اسم السائق الخاص للمخرج شوقي الماجري علي تتر "سقوط حر".
-الشيف ريهام الديدي علي ontv .. الوحيدة اللي مهما تشوف برنامجها في عز الصيام ، عمر ما نفسك تتفتح للأكل.
-الست لما بتبطل تحس بالامان .. بتبطل تحس انها ست اصلا .. صفاء الطوخي "سقوط حر".
-البني ادم لما بيموت الناس لو جابت سيرته مش هيقولوا كان موظف شاطر وكفأ ولا لأ، هيقولوا كان بني آدم كويس ولا مش كويس.. سوسن بدر "جراند اوتيل".
-الجامد جامد بحب الناس مش بالفلوس.. هادي الجيار "الاسطورة".
-ربنا يرحمك يا أمي ويرحم امهاتنا جميعا ويخلي أمهاتكم يارب.