ضحكات متقطعة شريرة

زهقت من حرق الدم؟ اتخنقت من شدة الأعصاب؟ استكفيت من كوابيس المستقبل السياسى اللى بيظهرلك فيها المرحوم عبحليم يقولك: «طريقك مسدود مسدود يا ولدى؟»، إذا أدعوك اليوم لنبتعد عن السياسة وقرفها وتعب أعصابنا ووجع قلبنا معاها، لنتذكر سويا إن بقية حياتنا مليانة أشياء بعيدة عن السياسة، لكنها أيضا مقرفة، متعبة للأعصاب وموجعة القلب، (تخيلت إنت إنه هيبقى مقال فرايحى.. عليك واحد)، ومع ذلك بنطنش نناقشها أو نتوه عشان ما بنحبش وجع القلب والدماغ وبنأجل الكلام فيها أو التعامل معها انتظارا للوقت «المناسب»، بعد الانتخابات أو بعد كاس الأمم أو بعد ما نفوق من موضوع العبارة أو القطر أو الطيارة أو غزوة البوسترات، فى النهاية الوقت «المناسب» ده مابيجيش أبدا، أو بييجى فى شكل فورات، حد يطرح الموضوع، وحد يتحمس لمناقشته، والمجتمع كله ينشغل بيه ويتناقش ويتخانق ويطق له عرق أو اتنين وبعدين «هوف» يتبخر فى ظرف 3 أيام، أو تحصل حادثة كبيرة، فيتحول لكائن حى له ملامح، والكل ساعتها بيعتمد تعاطفه أو نفوره من الموضوع على تعاطفه أو نفوره من صاحب المشكلة نفسه.. من أمثلة المواضيع دى مثلا موضوع «التحرش»، عارفة عارفة، أكيد إنت بتبص للسقف بزهق أو بتنفخ تعبيرا عن الملل، أو بتقول لنفسك، الواحد زهق زهق التنين من الموضوع البايخ ده، طب خلينى أسألك سؤال، لما انت زهقت من مجرد الكلام فى الموضوع ده؟، ما بالك بالبنات اللى بتتعرضله كل يوم؟

المشكلة الرئيسية إن الرجال فى مصر ما يعرفوش، أو عارفين ومطنشين، أو عارفين ومش عايزين يصدقوا إن مافيش امرأة مصرية (مصرية سادة أو مزدوجة الجنسية حتى) ما مرتش بعدد معتبر من تجارب التحرش فى حياتها، يقابلنا دائما نفس الرد الرجالى الممل الرخم المتكون من ضحكات متقطعة شريرة مصحوبة بالمقولة الخالدة: «البنات المحترمة ما بتتعاكسش»، تحاول تفهمهم إن حتى المنتقبة بيتم التحرش بيها، حتى كبيرة السن بيتم التحرش بيها، بل إن ليا صديقة مقعدة على كرسى متحرك حكتلى إنها أيضا بيتم التحرش بيها، ولما نزنقهم قوى فى النقاش يعتمدوا فى ردهم على الخطاب الدينى اللى هو موضة 2012، (مش الخطاب الدينى اللى موضة، الموضة هى إن الناس تحاول تقطع مناقشتك وتكتم صوتك بمجرد ما ترمى ناحيتك عبارة مغلفة بغلاف دينى عشان يخلص منك ومن لسانك الطويل).

على خلفية الضحكات المتقطعة الشريرة برضه بنسمع النشيد الوطنى للدفاع عن المتحرشين اللى بيبدأ بكلمه «كل ده عشان المجتمع مافيهوش دين»، ولما بنفكرهم إن فى الستينيات والسبعينيات ماكانش فيه حجاب وماكانش فيه انتشار لمظاهر الدين ومع ذلك ماكانش فيه تحرش على الأقل بطريقة مد الإيد، يتزنقوا فيضحكوا ويقولولنا قلة الجواز السبب، نقولهم نص المتحرشين متجوزين، يتزنقوا فيضحكوا ويقولوا الاقتصاد، نقولهم اللى راكب عربية فخمة وبيكسر على واحدة فى الشارع ده ماله ومال الاقتصاد؟، يضحكوا ويقولولنا قلة التعليم، نقولهم طلبة المدارس والجامعات نسبة كبيرة منهم متحرشين، ويستمر الحوار إلى الأبد بين بنات ونساء مصر المجروحين وشباب ورجال مصر الساخرين.

ما بافهمش الحقيقة ليه كل هذه المقاومة من جانب الرجال لفهم موضوع بيؤرق حياة معظم بنات مصر، بل وبيبوظ حياة كتير منهم بسبب عشرات العقد والكلاكيع، ليه النفى المستمر لظاهرة بنحاول نلفت انتباههم لتناميها من سنين؟، ليه غض البصر عن مصيبة وجدت مكانها حتى فى البروشورات السياحية اللى بتحظر زائرات مصر من رجال مصر المتحرشين؟، إيه الحلقة المفقودة اللى ممكن توصل الحقيقة دى للرجل المصرى وإيه هى الطريقة اللى لازم تصاغ بيها عشان يفهم إن الموضوع ده كارثى وإن الوضع بجد خطير؟ وامتى كل راجل مصرى هيفهم إنه بسخريته من الموضوع واستخفافه بيه وضحكاته الساخرة من أى بنت بتتعرض للموقف ده أو بتحكى عنه أو بتحاول تناقشه فيه، هو بمثابة مشاركة منه فى حفلة التحرش الجماعى اللى بتقام ضدها كل يوم. ظاهرة التحرش عمرها ما هتنتهى على إيد الستات، مش مطلوب من كل واحدة فينا إنها تشيل مطواة أو تلبس طاقية الإخفا عشان تحمى نفسها وجسمها وكرامتها ونفسيتها من المرمطة اللى بتتعرضلها كل يوم.

ظاهرة التحرش فى مصر هتنتهى لما كل رجل مصرى مش بس يمتنع عن ارتكاب فعل التحرش بإيديه، لكن كمان يبطل يشجعه ويبرره ويسخر منه وقت ما يشوفه قدام عينيه، بابتسامة أو بضحكة عبيطة تحمل فى طياتها شر غير معلن بيحسسنى أحيانا إنه مش بس ما يهموش اللى بيحصل للضحية، أو بيهرب من المواجهة لأنه أجبن من أن يحميها، بل بيستمتع بعقابها على إيد حيوان آخر بيشترك معاه فى بعض الصفات التشريحية فقط لأن هو مش طايلها بإيديه.