عثمان محمد عثمان

قال لى د. عثمان محمد عثمان وزير التنمية الاقتصادية فعلا أنا قلت الحكومة غير مسئولة عن الفقرا لأن الفقر مسئولية الفقير واللى بيشيل قربة مقطوعة بتخر على دماغه.. وصحيح أنا لما كنت صغير كنت بحدف الفقرا بالطوب وأطلع أجرى لكن مش معنى كده إنى باكرههم.. لأ.. أنا بس ما حبهمش.. وكلنا عارفين مفيش حكم ومواعظ زى أمثالنا الشعبية اللى بتقول بحكمة «الفقير ريحته وحشه».. وهمه نفسهم معترفين فى الأمثال إن الفقر نعمة وبيقولوا «اللى عنده عيش وبلله عند الهنا كله».. ليه بقى إحنا نزعلهم ونقوللهم بلاش العيش المبلول وكلوا بغاشة؟ أقولك يا سيدى تعريف مين هو الفقير هو أى واحد دخله اليومى أقل من 150 قرش يعنى لو دخله 149 قرش يدخله فى شريحة الفقرا.. وب150 قرش ممكن ياكل خضار ورز ولحمة والحلو أم على أو كنافة بالقشطة.. لأ طبعا.. الوجبة دى هو وعيلته فى حدود خمس أشخاص.. وأنا بكرر الحكومة غير مسئولة عن الفقرا وفقرهم ولو حضرتك شفت الرسم البيانى ده حتلاقى نسبة الفقرا بسيطة جدا لأن الفقرا بينقرضوا عن طريق الانتقال لطبقة أخرى زى محمد على باشا مثلا كان من عيلة دخاخنية بياكلوا فول وطعمية، جه محمد على نقلهم من شريحة الفقرا لشريحة الملوك والأمرا.. وثانيا بينقرضوا بالأمراض اللى محوطاهم، وثالثا بينقرضوا بالزلازل اللى ما بتموتش غيرهم عشان بيوتهم خايبة فى البنا.. لا لا لا.. محدش م الفقرا بيموت م الجوع إلا إذا كان عامل ريجيم قاسى عشان يخس.. وأقولك الوسيلة الوحيدة للقضاء على الفقر هى القضاء على الفقرا.