هاني خليفة يشيد بمخرج «لعبة نيوتن»: تامر محسن بيعمل شكل تاني للشغلانة

أشاد المخرج هاني خليفة، بزميله تامر محسن، مخرج ومؤلف مسلسل "لعبة نيوتن"، حيث كتب منشورا طويلا عبر حسابه الرسمي على موقع التواصل الاجتماعي "فيسبوك"، يثني فيه على موهبة "محسن".
قال: "تامر محسن في (لعبة نيوتن) مش بس بيحافظ على نجاح بقى مرتبط باسمه في كل عمل، لا هو بيعمل شكل تاني للشغلانة غير السائد في المسلسلات عندنا، (يمكن أقرب لنموذج صانع المشروع المتعارف عليه خارج الوطن العربي)، هو هنا مخرج مؤلف، له أسلوب ووجهة نظر فيما يحكيه، والجميل أنك ماتبقاش عارف ولا متوقع هايعمل إيه، بس الأكيد أنه هناك وعد متحقق دائما بمغامرة إنسانية وفنية ما، وهاتتورط فيها كمشاهد يعني هاتتورط".
وتابع: "هاتلاقي المشهد اللي يجيبك،
مشهد مني زكي وهي في جلسة تقييم الصحة النفسية، وهي بتقول إحنا غير
إحنا لما بنحب حد، بنقوله بموت فيك،
مش بس مشهد مكتوب حلو، ومتمثل حلو وكل حاجة، لا، ده بيخليني أفكر، آه صح ده إحنا فعلا غير، وأسئلة بقى، طب هو ليه، طب مين أحسن؟ وقابل بقى، ده منتهى الطموح في دور الفن أنه يخليك تفكر".
وأكمل: "ممكن يكون المسلسل بيوترني كمشاهد، أو بيستفزني أحيانا طريقة السرد، أو اتخاذ الشخصيات لمسارات درامية معينة، كواحد من اللي أيديهم في الشغلانة، لكن يتلاعب بنا تامر محسن كمشاهدين، واللي أيديهم في الشغلانة، ويفاجئنا بإيقاع حكي لا تستطيع معه إلا أن تسلم له نفسك".
واستطرد: "ويجي في حلقة النهاردة ويحطنا في مواقف غريبة مع الشخصيات (حتى وإن كنا متوقعين المسار)، لكن يغوص بينا تامر في عمق إحراج اللحظة، وغرابة الطلب وتوقيته، من فراج لمنى وتايسون اللي مابيكملش السيجارة، علشان بيفتكر حجم المشاعر اللي كانت موجودة وبتضيع منه حالا، لا كلام كتير أوي يا تامر، إنسانية عالية منك، منتهى الإعجاب والاحترام والتقدير والله".
يذكر أن مسلسل "لعبة نيوتن" حقق تفاعلا كبيرا مع الجمهور منذ عرض أولى حلقاته، وحسمت بطلته الفنانة منى زكي لقب أحسن ممثلة لهذا الموسم بجدارة، رغم عدم انتهاءه، ويشارك في البطولة عدد كبير من النجوم منهم منى زكي ومحمد فراج ومحمد ممدوح وسيد رجب وعائشة بن أحمد.

تامر محسن في لعبة نيوتن مش بس بيحافظ علي نجاح بقي مرتبط باسمه في كل عمل لا هو بيعمل شكل تاني للشغلانة غير السائد في...
Posted by Hani Khalifa on Tuesday, April 27, 2021