قال الإعلامي عمرو أديب، إن الرئيس عبدالفتاح السيسي، وقع على إقرار ذمة مالية، معقبًا: «اللي هيقولي ما شفتوش، طب ما يوم ما هيحصل حاجة هنشوف الإقرارات دي، ومن باب أولى الناس اللي بتسأل على متعلقاته الشخصية زي أيمن نور يقولنا بيصرف على القناة اللي بيديرها منين». وأضاف خلال تقديمه برنامج «الحكاية»، المذاع عبر فضائية «إم بي سي مصر»، مساء الأحد، «أنا عايز حد يقدم دليل فساد، ولو في فساد أنا أول واحد هيقول، لكن لحد دلوقتي الناس بتشتغل في البلد بإيديها وسنانها، وعايزة تعمل حضارة جديدة، واللي بيحصل في مصر حاليا بيتكلموا عنه في الخارج». وتابع: «عايز أعيش الكام يوم اللي باقين من عمري مش مضروب على قفايا، مش عايز أموت زي الكلب زيهم برة، عايز أموت في بلدي عزيز كريم احترم بلدي والجيش والشرطة، عبد الفتاح السيسي كان ممكن يسلمنا كلنا أيام مرسى وكان يتوزن دهب، ولكنه مرضيش عشان محدش يقول بطبل ليه»، على حد قوله. وأكمل: «أنا لا أدعو أحد للدفاع عن البلد اللي بيحب البلد هيدافع عنها، مش بقول لحد يكتب تويتة أو هاشتاج مش عايزين حاجة من حد مش حاسس بيها، بعد ما الإرهاب على الأرض فشل شغالين إرهاب إلكتروني، الراجل ده بعد كام سنة نازل انتخابات، هاتولنا انتوا الزغلول الكبير اللي بتجهزوا مش عايز أقول أسماء، بقول للناس اتقوا الله في البلد، والبلد دي فيها ناس مش هتسيبها تقع».
