سوري يا جماعة.. الإسلام طلع دين معتدل

- لا يا سيدي المسألة مفيهاش احتمالات
- يعني لازم لازم؟
- طبعا يا أخي. هذا جهاد والجهاد فرض
- يا مولانا أنا خايف على الولاد. اقتنعوا بكلامك وهيسيبوا الجامعة. فكر كده شوية يمكن المسألة فيها قولان
- قولان ازاي يا راجل. هي الحاجات دي فيها هزار؟!
- فيها ضياع عمر. الولاد مصرين يسافروا للجهاد بعد ما سمعوا خطبتك
- ونعم الشباب والنخوة والرجولة. ماشاء الله. ولم لا تقتدي بهم وتتبعهم للجهاد؟
- يا مولانا انا جايلك تثنيهم عن عزمهم. تراجع كلامك. يمكن ربنا يعني..
- حاشا لله. انت هتعرف اكتر مني؟ هذا كلام الله لا ريب فيه. اوتنكر كلام الله؟ أو تعصاه وتخالف أوامره؟
- استغفر الله العظيم يا رب. ما اقصدش والله. لكن مش برضه القرآن حمال أوجه؟
- حاشا وكلا يا راجل. مفيش حاجة اسمها كده والجهاد مش لعبة علشان نقعد نغير المعاني ونتلاعب بيها.
- ما اقصدش يعني لكن آيات القرآن نزلت في سياقات محددة وهناك أسباب لنزولها. مش ممكن يعني أوامر الجهاد كانت مرتبطة بسياق نزول الآية وبما كان يحدث في مكة أو المدينة وقتها؟
- باقول لحضرتك إيه. انت دكتور؟
- لأ.
- يعني لما بتمرض بتروح لطبيب.
- صحيح.
- ولما تروح لطبيب بتقعد تنظر عليه وتراجعه في كلامه وتعلمه يعالج الناس ازاي ويشفيهم من الأمراض بأي أدوية، والا بتحترم العلم اللي قعد يدرسه في الجامعة؟ أكيد بتحترمه. عالم الدين زي الطبيب. درس القرآن والتفاسير والأحاديث وعلوم الرجال والجرح والتعديل والفقه واللغة العربية. ما يصحش بعد ده كله حضرتك تيجي تراجعني في كلامي وتعلمني ربنا كان يقصد إيه.
- مش القصد يا مولانا بس أنا خايف على الأولاد وبسأل يعني احتمال يكون في تفسيرات مختلفة. ما هو لو كان كلام ربنا له معنى واحد كان بقى عندنا تفسير واحد. المجتمعات بتتغير وظروفها بتختلف.
- انت شكلك هتكفر كده. القرآن مش لعبة علشان نقعد نغير في معانيه. والكلام اللي باقوله ده مجمع عليه من العلماء كلهم.
- كلهم كلهم؟
- أيوه يا سيدي. باقولك إجماع. دي ثوابت ما بتتغيرش بمزاجنا ومش هنقعد نفاصل فيها. ياللا استغفر ربك وادعي لأبنك ربنا يبارك له.
- مش إبن واحد بس. الاتنين مصرين على السفر.
- ماشاء الله، الله اكبر. هكذا ينتصر الدين وهكذا تعلو كلمة الله..
(بعدها بشهور)
- البقية في حياتك
- حياتك الباقية يا مولانا. والله مش عارف اقول ايه؟ الولدين كانوا سندي اللي هيشيلوني في المستقبل.
- يا راجل ربك كريم. بقى مش عاوز تفرح لهم. ده زمانهم في الجنة بيجروا ورا الحور العين. اوعدنا يا رب... هههه
- ماتوا يا مولانا ماتوا
- بل استشهدوا في سبيل الله
- يعني ما كانش...
- لا ما كانش. يا سيدي. هذه سنة الله. ولا تجدن لسنة الله تبديلا. كلام ربنا واضح وأوامره مفيهاش التباس ولا مناقشة. مبروك على أولادك الجنة.
(بعدها بسنوات)
- أوبس..
- فيه إيه يا عم الشيخ..
- سوري يا جماعة. آي ميد أي ميستيك. الإسلام طلع حاجة تانية خالص غير اللي كنت باقولكم عليه.. أنا الظاهر كنت متشدد.. يالا معلش.. حصل خير!
- عادي كده؟!
- عادي...
(وفي سياق شبه متصل أعلن الشيخ عائض القرني اعتذاره للمجتمع السعودي عن فتاويه المتشددة التي كان يصدرها كواحد من مشايخ "الصحوة" الإسلامية منذ الثمانينات. وأكد أنه من الآن فصاعدا سيدعم الإسلام المعتدل الذي يدعو إليه ولي العهد السعودي محمد بن سلمان)