حوار مع صديقه المؤمن

يا حسن يا بنى أنا قلق عليك. ما تتحدث به يخالف صحيح الدين.
إزاى بس فضيلتك؟! ده اللى اتعلمته من أبويا الله يرحمه. حد يكره الحب والود بين الناس؟!
من قال هذا يا ولدى؟ ديننا الحنيف يحمل منظومة كاملة من الفضائل. كله ود ورحمة بين عباده المؤمنين.
أمال إيه المشكلة؟ وليه بتزعل كل ما تشوفنى مع جورج وتاخدنى على جنب وتحذرنى وتقول لى المسلم ما ينفعش يصادق مسيحى؟
باقولك «بين عباده المؤمنين» تقول لى جورج؟! هو مشرك ومآله جهنم وبئس المصير. له عليك القسط والعدل، أما المحبة فهى تناقض بابا عظيما من أبواب التوحيد، ألا وهو الولاء للمؤمنين، والبراء من المشركين.
مش عارف يا مولانا. فضيلتك أحرجتنى لما قابلناك بالصدفة على الناصية بعد جنازة ابوجورج الله يرحمه، وأول ما قلت لك تعزيه وتدعى للميت، رحت سايبنا وماشى!
أعوذ بالله. استغفر الله يا بنى مما فعلت استغفر. لقد ارتكبت إثما عظيما بدعائك له بالرحمة. طلب المغفرة للمشرك حرام بالإجماع.
ما هى دى مش فاهمها برضه. هو أنا يعنى معايا مفتاح الجنة؟! والا استغفر الله العظيم باغصب على ربنا يرحم الراجل؟! العبد يدعى وربنا له الأمر من قبل ومن بعد. معقول يعنى الخالق يزعل منى عشان باحب خلقه وباتمنى لهم الخير؟!
عقلك ده هيضيعك ويضيعنا. العقل له وظيفه واحدة يا حسن. تركبه زى الحمار لحد ما يوصلك للمولى سبحانه وتعالى، وبعدين تركن حمارك وتنزل وتتأدب وتسمع الكلام من غير تفكير. ما تخليش حد يلعب فى دماغك ويعصيك. ابعد عن الشيطان ووساوسه.
تصدق بالله يا مولانا.. كلامك بيخلينى دايما خايف من الشيطان. خايف يظهر لى ويغوينى. مش ممكن برضه؟
اطمئن. معشر الإنس لا يرونه بصورته رغم أنه يراهم.
أمال يغوينى إزاى؟
بالهواجس التى بيحطها فى راسك وبتقولهالى طول الوقت.
بس كده؟ طب والله كويس.
كويس إزاى يا حسن؟
لأ يعنى. اطمأنيت إنه مش ممكن يظهر ويكلمنى.
انتبه. بمقدور الشيطان أن يتمثل بالبشر ويظهر على هيئتهم.
هارسود!
طبعا يا بنى. يحدثك وتحدثه. هذا ثابت فيما روى عن أبى هريرة.
ولما يظهر بتبقى حواجبة تخينة كده وشكله قبيح؟ هههه
أكيد لأ. إذا ظهر لغوايتك سيتمثل لك فى صورة حسنة تجذب قلبك. وسيحدثك بمعسول من الكلام تطرب له نفسك.
والله طمنتنى. كنت خايف شكله يبقى زى ابولهب فى الفيلم والا يطلع لى نار من بقه.
هههه يجازى شيطانك يا حسن. ما تستهترش يا بنى. الشيطان صاحب مكر وحيلة.
يعنى مش هيقول لى اسمع الكلمتين الشيطانى الحلوين دول منى؟
هههه بالطبع لا يا ولدى. مش هيقولك إنه بيقول كلام شياطين وإلا مش هتسمع له.
أهو انت قلتها يا مولانا، يبقى انا معنديش هواجس. لو الشيطان عاوز يغوينى أكيد مش هيقول لى مثلا حب الناس كلهم وودهم وعاشرهم بالمعروف واتمنى لهم الخير والرحمة؟
يعنى إيه يا حسن؟
قصدى إن الشيطان أكيد هيبقى كلامه كله توقيع. هيبقى عاوز يكرهنى فى الناس مش يحببنى فيهم. ومادام بتقول إنه مش غشيم فى حواراته، يبقى مش هاستغرب لو رطن لى بالفصحى، والا حتى حط لى آيتين قرآن بعد كل جملة وهو مسبل عنيه وراسم التقى والورع. ده مش بعيد حتى يكون ماشى طول الوقت وهو ماسك مصحف زى اللى مع فضيلتك كده، والا حتى لابس.. لابس.. يا خبر اسود!!
ماذا بك يا حسن؟
لا مفيش حاجة فضيلتك.. بعد إذنك بس عشان افتكرت معاد مهم جدا.. مع جورج.