إحم إحم

«جمعية أم هشام» تحت طائلة القانون !

مكالمة من أمي في البلد:
- إزيك ياولدي وعاملة إيه مرتك وعيالك؟
- بخير يامه الحمدلله إزيك انتي؟
- مش تمام ياولدي وخلاص بجد بافكر أهاجر أمريكا!
- هههههههه الله يحظك يامه البلد دي أحسن من غيرها!
- مش معقول ياولدي يعني حتي الجمعية الحكومة بصالنا فيه!
- جمعية إيه يامه مش فاهم؟
- أنا مش عارفة انت صحفي إزاي ومش عارف إللي بيحصل في الدنيا؟
- من غير تقطيم يامه الله لا يسيئك أنا إللي فيا مكفيني.
- مش الحكومة ياولدي خلاص وافقت علي قانون الجمعيات الأهلية؟ أنا لسه سامعة الخبر في النشرة.
- ايوه يامه طيب بس متآخذنيش يعني وده يضرك في إيه؟
- نهار اسود ومنيل يابني أنا حياتي كلها جمعيات اومال لومكنتش بادخلك معايا في كل جمعية وأقبضهالك الأول كمان؟
- ههههههههه يامه أكيد بتهزري القانون ده خاص بالجمعيات الأهلية في مصر مش الجمعية بتاعتك؟
- طب هو إحنا مش أهالي وبنعمل جمعيات وكل واحد بيقبضها شهر؟يبقي أكيد الحكومة عينها علينا ونفسها تقبض معانا شهر؟
- هههههه طب وماله لو حتدفع زينا تقبض.
- الحكومة تقبض بس يابني لكنها عمرها ماتدفع ومش بعيد كمان تطلب تقبض الأول!
- يامه انتي حاتشككيني ليه في الحكومة وأنا مش ناقص شك أصلا!
- انت قريت القانون؟
- ههههههههه الصراحة لا يامه.
- أنا بقي قريته؟
- قريتيه إزاي بس يامه احنا دافنينه سوا؟ !
- اتلم مش ناقصة تسيحلي في الجرايد، الواد ابن اختك جه زارني الضهرية وخليته يشتري الجرنان ويقرالي القانون كله!
- طب يعني الحمدلله اتأكدتي بنفسك إنه ملوش علاقة بالجمعية بتاعتك؟
- بالعكس ده كل مادة فيه بتقول إن جمعية امك هي المقصودة.
- ههههههه يامه حرام عليكي القانون لا فيه زينب ولا فيه ام هشام!
- فيه ياولدي وبالبنط العريض إذا كان اسمه قانون تنظيم العمل والمؤسسات العاملة في المجال الأهلي وانت عارف امك طول عمرها مؤسسة!
- يامه علي عيني وراسي لكن صدقيني ملوش علاقة بيكي
- اخرس وحاول تيجي بسرعة علشان نوفق وضعنا قبل المهلة ماتخلص!
- توفيق أوضاع إزاي يعني؟
- بيقولك لازم نخطر الجهة الإدارية بأسماء أعضاء الجمعية!
- يامه يعني قصدك الحكومة عايزانا نبعتلها جواب نقولها فيه اننا عاملين جمعية فيها امي واخواتي وبنات عمتي وخالتي والست عطيات جارتنا؟
- ومش بس كده لازم كمان نعرفهم مين إللي قبضها الأول ومين إللي لسه ماقبضش وحايقبض كام وهو داخل الجمعية ليه؟
- يعني أقول للحكومة مثلا أني داخل الجمعية علشان أكمل مصاريف مدارس العيال ولا أنتي علشان تروحي تعملي عمرة أو اختي علشان بتجهز بنتها؟
- اسم الله عليك أيوه صح كده وجهازالمحاسبات حايراقب كل الكلام ده.
- طب يامه ماتنسيش تبعتيلي فلوس الجمعية علشان أنا إللي هاقبض الشهر ده.
- خايفة عليك ياولدي وعلشان كده أنا صادرت الفلوس خلاص!
- صادرتي فلوسي يامه وبتقوليلي خايفة عليا ؟
- يابني المسافة بين عندنا في الصعيد وعندكوا بعيدة قوي ولو بعتلك فلوس الجمعية كان زمانك اتقبض عليك علشان قانون الجمعيات بيمنع أي عضو في الجمعية أنه يتلقي أموال من الخارج!