مكالمة من أمي في البلد إزيك ياولدي وعاملة إيه مرتك وعيالك؟ - بخير يامه الحمدلله طمنيني صحتك إزيها وحالتك النفسية عاملة إيه؟ - النفسية كانت محتاجة يومين في الغردقة ولا شرم. - شرم الشيخ ليه يامه خير اشمعني؟ - كنت عايزة أروح أحضر الاحتفال اللي كان هناك ده وأهي فرصة كنت غيرت جو. - بس ده كان خاص ببتوع مجلس الشعب! - يابني أنا الشعب يعني إذا كان النواب هيصولهم يومين فأنا أولي بالهيصة دي. - معلش يامه سامحيني يعني انتي في إيه ولا في إيه أبويا الله يرحمه لسه مكملش شهر ومينفعش تطلعي من البيت قبل شهور العدة يعني 4شهور و10 أيام وليكي عليا بعدها أفسحك في أي حتة عايزاها،ياما كان نفسي أعملك رحلة مع أبويا قبل مايموت. - اسكت لما أقولك مش أبوك جالي امبارح في المنام؟ - صحيح يامه؟ طب طمنيني أخباره إيه؟ - كان لابس أبيض في أبيض ووشه ولا البدر المنور. - الله اكبر الله اكبر. - بس مخبيش عليك الفار بيلعب في عبي! - ليه بس يامه دي رؤية جميلة ومعناها إن الحاج مبسوط ومرتاح. - ماهو ده إللي قلقني، واضح إن أبوك عملها واتجوز عليا! - يتجوز عليكي إزاي بس يامه بعد ما مات ؟ - أُمّال تفسر بايه اللبس الأبيض،لحسن يكون ده معناه أنه إتجوز عليا قبل مايموت؟ - لا يامه ده معناه إن الحاج هايص في الحور العين يامه، هنيالك ياعم الحاج. - ويطلعوا مين بسلامتهم الحور العين دول؟ - دول يامه يعني ستات كده زي ماتقولي ملايكة منورة ربنا بيكافئ بيهم الراجل المؤمن إللي زي أبويا الحاج،الله يبشرك يامه. - شوف ياخويا الواد فرحان إزاي يعني تبقي عارف إن أبوك هايص في الستات الحلوة دي وزمانه بيقارن بينهم وبين امك وانت فرحان وتقولي بشرتيني يامه؟ - هههههههه الله يحظك يامه،هو حد يطول وبعدين ياستي انتي أحلي من الحور وبعد عمر طويل هاتبقي سيدة الحور العين بتوع ابويا. - متأكد ياولدي من الكلام ده؟ - طبعا يامه متأكد اطمني وحطي في بطنك بطيخة صيفي ياه يامه ياه متتخيليش فرحتيني قد إيه هنيالك ياعم الحاج هايص في الجنة ياسيدي وسايبنا هنا في الدنيا بنتكوي! - ألا هي الأسعار في الجنة عاملة إيه؟ - في الجنة ربنا يوعدنا كل حاجة ببلاش. - يبقي علي كدة تلاقي الدولار في الجنة مايزدش عن خمسة ولا ستة جنيه؟ - دولار إيه وجنيه إيه،العملة في الجنة مش كده يعني مش محتاجة فلوس من أساسه انتي بس تتمني أي حاجة تلاقيها قدامك. - حتي لو سكر الجمعية؟ - ههههههه يامه سكر إيه ورز إيه الجنة أصلا مفيهاش جمعيات وكل إللي عليكي لما تعوزي حاجة بس تفكري فيها تلاقيها قدامك. - يعني حتي لو عايزة 10 كيلو سكر من الجمعية مرة واحدة؟ - يارب حتي مليار كيلو ثم عايز أقولك حاجة انتي في الجنة بإذن الله مش محتاجة سكر أساسا ولو عايزة أي حاجة مسكرة حتلاقيها مسكرة لوحدها من غير سكر. - ربنا يستر بقي من المحتكرين! - المحتكرين دول في النار يامه أنا باكلمك علي الجنة! - ربنا ينولهالنا ياولدي. - آمين يامه جمعا يارب. - تصدق لو قلتلك حاسة أني حسافرلها بعد العدة علي طول أصلها وحشتني قوي! - بعد عمر طويل يامه،للدرجة دي الحاج وحشك وعايزة تروحيله الجنة؟ - وحشني جدا طبعا بس أنا مش باتكلم علي الجنة دلوقتي. - أُمّال إيه إللي وحشتك وحاسة انه حتسافريلها؟ - شرم ياولدي وحشتني ونفسي اشوفها، ألا تفتكر كيلو السكر في شرم بكام؟!