كشف المخرج وائل إحسان، عن عمله كعامل في مجال البناء خلال بداية حياته، لكن المقاول الذي كان يعمل معه «نصب عليه في الفلوس»، قائلًا: «اشتغلت مع مقاول وطلعت ألف طوبة ب10 جنيه، وجيت آخر النهار، قال لي تعالى المكتب بالليل، فروحت لقيت ناس كتير مستنية الفلوس، وبعدين يومين تلاتة عيطت وقلت له الله ينتقم منك». وأضاف خلال لقائه مع برنامج «الستات ما يعرفوش يكدبوا»، المذاع عبر فضائية «سي بي سي»، مساء الأحد، أنه عمل كذلك كبائع للطعمية في محافظة الإسماعيلية، مستطردًا: «دلوقتي لما بروح أشتري طعمية من أي حد بقف قدامه بحترمه جدًا». وذكر أن بائعي الطعمية يبذلون الكثير من الجهد بداية من تنظيف الفول منذ المغرب، ثم الاستيقاظ عند الفجر لتجهيز الأدوات، وحتى بيع الطعمية في النهاية، معقبًا: «أنا كنت بعمل كل حاجة في بيع الطعمية». وأوضح أنه كان يتقاضى حوالي 4 جنيهات، حتى يستطيع أن يشتري الملابس المناسبة له كطالب في معهد السينما، معقبًا: «كنت رايح معهد السينما بقى وعايز أجيب لبس وجبت نظارة وكل ده من الطعمية، ولما عملت فيلم ساعة ونص حطيت فيه العذاب اللي بيشوفه بتاع الطعمية».