تتنافس البرامج التليفزيونية كل أسبوع على استضافة أشهر نجوم ونجمات الفن، للحديث عن أمور شخصية وفنية، تضمن الخروج بتصريحات جريئة، تحقق أعلى نسب مشاهدة.. وفي السطور التالية، يستعرض "مصراوي"، أبرز 7 تصريحات لأهل الفن في البرامج الفنية خلال الأسبوع الماضي: كريم فهمي استضافت الإعلامية منى الشاذلي، في حلقة جديدة من برنامجها "معكم"، المعروض على قناة CBC، الفنان كريم فهمي، للحديث عن فيلمه الجديد "علي بابا"، وتطرق خلال حواره للحادث الذي تعرض له مؤخرًا. وقال كريم "كنت بصور مسلسل (أمر واقع) لعرضه في رمضان فيه أكشن كتير، كنا بنصور مشهد المفروض إني بمشي بالموتسيكل جامد وبخرج برا الكادر وبقف، وأنا بصور حبيت أهدي قبل مطب لقيت الموتسيكل وقع نصين والموتور نصين، واتنقلت على المستشفى شرخ في الرجلين مزق في الكتف وكدمات، وكنت عايز أقلع الخوذة قبل التصوير لكن المخرج أصر اني البسها". حسن كامي كشف الفنان حسن كامي أثناء استضافته في برنامج "مساء dmc"، عن الكثير من تفاصيل حياته الشخصية وعلاقته بزوجته الراحلة، وقال "كانت زوجتي حبيبتي وعشيقتي وأمي وأم ابني، لما ابني مات في حادثة وقفت جنبي جامد لدرجة إني مش متصور كان هيجرالي ايه لو مكنتش معايا، لاني اتهزيت اوي، كان ابني الوحيد اللي اديته كل حياتي، وعشان كدا كتبت كل ثروتي باسمه واسم والدته". وتابع "بحاسب نفسي جامد إن كان ليا فلتات مش حلوة، ولما زعلت مني لاني جرحتها بسبب شطحات منتصف العمر، كنت بغني في الأوبرا وطول النهار أحب دي وأكلم دي، الواحد بيتوه ساعات، وكان أول مرة تعيط من تحت راسي وطيت وبوست رجلها وقلتلها عمري ما هعمل كدا تاني". محمد نور حلّ الفنان محمد نور ضيفًا على برنامج "مع دودي"، المعروض على قناة "النهار"، وأكد خلاله أنه لم يفكر يومًا في الزواج من داخل الوسط الفني، لافتًا إلى أن الأمر كان مرفوضًا بالنسبة له، وقال "مستحيل اتجوز واحدة بتمثل أو حتى بتعمل أخبار، مش حابب ان مراتي تكون معروفة في الميديا، ومحبش إن مراتي تشتغل، تقعد في البيت وتاخد بالها من الأولاد وتتدلع". عمرو يوسف وأطل الفنان عمرو يوسف على جمهوره، في حلقة من برنامج "صاحبة السعادة" الذي تقدمه الفنانة إسعاد يونس، على قناة CBC، وتحدث عن الموقف الذي فقد فيه النطق أمام الفنان نور الشريف أثناء تصوير مسلسل "الدالي". وقال عمرو "أول مشهد في الدالي أمام الفنان نور الشريف، مش هنساه لغاية النهاردة وطول حياتي، تالت يوم تصوير كان مشهد بيني وبين أستاذ نور، بيجيلي البيت بيقولي كلمتين بالضبط، وانا ببدأ صفحتين تلاتة بتكلم، كلام تقيل وكنت حافظ واستاذ نور لن يسمح بمجال للهزار، وفجأة استاذ نور قال كلامه وانا المفروض اتكلم، صمت وعرق، مع اننا في شتا، أفتح بقي مفيش كلام". أمير كرارة وحكى الفنان أمير كرارة في برنامج "صاحبة السعادة"، موقف محرج تعرض له في لندن، وقال "كنا في ملاهي وروحنا قعدنا طول اليوم هناك، مراتي سقعت قلعت الجاكيت ادتهولها، وروحت اشتريت جاكيت من الملاهي مكنتش اعرف ان اللي بيلبسوه الناس اللي معهاش فلوس، ولعبنا طول اليوم واللبس اتمرمط، واحنا مروحين كان معايا واحد صاحبي ومراته وخمس عيال، لقيت محل ماركة ملابس بحبها، جيت ادخل المحل لقيت صاحب المحل بيمنعني أنا وصاحبي". وتابع "كان راجل إيراني، وقف ادام الباب وقالنا إن الملابس اللي جوا غالية واحنا مش هنقدر نشتريها، وبعد ما عرف اسمي عمل بحث على جوجل، ولقى أخبار كتير فاعتذر". نرمين الفقي وفي حلقة من برنامج "الستات مبيعرفوش يكدبوا" المعروض على قناة CBC، حلت الفنانة نرمين الفقي ضيفة، وتحدثت عن عودتها للفن وسبب غيابها، وعن الفن قالت "الفن مالوش عزيز، فهمت ده متأخر كنت بسمع مين بيتوفى إزاي، ومين مش معاه ولا مليم لكن إني اتخيل كان شيء مستحيل، لسبب إن القنوات الفضائية كتير جدا وبتكتر". وأشارت إلى أنها وجدت البعض يقول لها إنهم سمعوا أخبار تفيد بزواجها واعتزالها، أو أنها سافرت رغم أنها كانت تجلس في البيت. نجلاء بدر في برنامج "تعشبشاي"، الذي تقدمه الفنانة غادة عادل، على قناة DMC، تحدثت الفنانة نجلاء بدر عن المسلسل الذي ندمت على الاشتراك فيه، وهو مسلسل "ستات قادرة"، وقالت "مفيش ممثلة مش بتمر بتقديم أعمال تندم عليها، (ستات قادرة) كنت حباه جدا كورق بس التنفيذ معجبنيش، مع انه حقق نجاح كبير جدا مع الجمهور، لكن أنا كممثلة كنت حاسة إن ادائي وحش أوي".
