قل لي ياصاحبي

بوابة شموس نيوز – خاص
قل لي ياصاحبي
اللي ع الشمال وع اليمين
هي الدنيا موديانا فين ؟
ياترى هنكون بكره سوا
ولا هتبعدنا السنين ؟
قل لي ياصاحبي
هايجي اليوم اللي هاقولك
ياااه
فاكر لما كنا صغيرين !!!
كنا بنضحك ونلعب
ومش همانا السنين
والنهارده
بنحسب الوقت اللي بعده
هنبعد
بالساعه واليوم واليومين
ياترى هانشوف بعض تاني ؟
ولا
لما تسأل علي واسأل عليك
هنقول لبعض
مشغول شويه
كلمني بعدين ولاا
لما أناقشك وتناقشني
ونختلف
يمكن
ساعتها أقولك أو تقولي
انت مش عارف انت مين
وأنا مين!
ربي وحده اللي عالم
ايه مخبيه السنين
لينا صاحب النهارده
بيوجعنا ألمه
قوي
وبندعي يبعد عنه مرضه
و
يرجع تاني يضحك
مش عايزين نشوفه
أبدا حزين
ياترى ياصاحبي
هاندعي بكره لمين ولا مين
ياترى
رايحه بينا الأيام لفين
هتسأل علي؟
واسال عليك ؟
ولا هاتشوف واشوف
صحاب تانيين ،،
بس مش هتبقى ليهم مكانة
صاحبي
اللي عارفه من واحنا جدا صغيرين
ضحكنا لعبنا
اتخانقنا اتصالحنا
ذكريات حفرت اسمك واسمي
مش هتمحيها السنين
لما احكي لولادي
وتحكي
عن أصحاب مدرستي الصغيرين
اللي النهارده كبروا
وبدأوا
يدوقوا طعم تاني للسنين
بمسؤليه
كلها أسئله
ياترى موديانا فين السنين
في الصوره
كنا عاطين للهموم ضهرنا
بحجة اننا صغيرين
النهارده
خلاص كبرنا
ولازم نتصورها تاني بوشنا
ونواجه الدنيا بقلوب شديده صغيره
بس مليانه قوه تتحدى السنين
مين عارف
ياصاحبي
يمكن تفضل صورتنا طول عمرنا
ويبقى معانا فيها ولادي وولادك
متجمعين
يلعبوا قدام عنينا يتصورا
تلاته مش مهم مين فيهم
ع الشمال وع اليمين
للهم عاطيين ضهرهم
قلبهم
قلب واحد صغير واصحاب قوي
زي ماكنا احنا
لحظة الصوره دي متجمعين
بنضحك ونحلم مش مهم عندنا
مين
اللي ع الشمال وع اليمين
باتمنى تكون أيامنا اللي جايه
كلها
خير وفرح كتير
ذي ما كانت واحنا صغيرين
لو نسيت ياصاحبي
أسال عليك
وخدتني دنيتي
تسأل علي
وانا برده هاعمل كده
وأسال عليك
أصلك من النهارده هاتوحشني قوي
هاتاخدنا الدنيا بهمهاوبفرحها
بس مش هانسى
اللي كانت معاهم احلى السنين
فيها البراءه والصداقه
اللي هاتفضل جوانا
مهما عدت بينا السنين
نكبر وهي معانا في قلبنا
مش مهم انت مين ولا احنا مين
من كتر ما احنا قلب واحد
مايهمش مين انا ولا مين
صاحبي
اللي ع الشمال وع اليمين
منال الخميسي