أم المصريين

في ليلة سهرني فؤادي
شغلي بالي خلاني أفكر
ياتري اللي حصلها كان عادي
ياتري هاتستحمل هاتقدر؟
هاتقدر تعدي من الأزمات
والايام الصعبة ديه؟
هاتقدر واللا الوقت فات
واتظلمت زيك يابهية
قعدت أكلم نفسي كتير
وانا مش عارف انا ايه بيا
وفجأة صوت جي من بعيد
صوت حزين قرب عليا
مليان انين شد انتباهي
بضرب بعيني لقيتها جايه
عروسة لون الخدود أحمر
وأحلي مافيها شعر أسمر
والقلب ابيض منه مافيش
وجوا القلب وقار وهيبة وسلام وحب وشموخ وطيبة
وجوا حضنه ملايين تعيش
وابتديت انصتلها اسمع كلامها وأحسها لقيتها فرحانه وحزينة حسة بقلق لكن رزينة رغم التوتر لكنها كانت واثقة من نفسها
سألتها.... الفرحة دي ايه سرها؟ والحزن ليه زاد عنها؟
ليه التوتر والقلق؟ كان معاكي شيء واتسرق؟ طب انتي مين؟
طب رايحية فين؟ أبوس ايديكي متدمعيش قلبي عليكي اتحرق
ردت وقالت..
الفرحة دي ابني فرحتي بولادي اللي تعبوا واللي ضحوا واللي قاموابأحلي ثورة واللي غنولي بلادي...
والحزن ده برضه علي ولادي بس اللي خلوا بيتي فاضي
اللي كسر واللي دمر واللي باع تاريخي عادي..
الله يسامحهم جرحي زاد هما صحيح فعلا ولادي
وباعوني زي ماباع عواد ورخصوني في المزاد
والسبب كان الطمع كان الجشع كان الفساد
ومن النهارة مافيش فساد وانا اللي خلفت الولاد
اما التوتر القلق.. واللي راح واللي اتسرق.. فالسبب نفس السبب هو الفساد اصله ولاء للعناد
ماهو أصل ماحدش اعترف وكله قال انا ذو ترف مافيش ضمير ومافيش شرف جتهم أرف.. الذئاب
الذئاب جوا السجون ليهم كلاب بره السجون
جالهم صرع حالة جنون عايزين يهدوا اللي اتبني بيضربوا ويكسروا وبيخربوا وبيدمروا احلي حلم حلمته انا
أنا اللي شوف من كام سنة بالسكوت محكوم عليا.
وبالسواد غموا عنيا واما حسيت
يوم الهنا استكتروا الفرحة عليا
سرقوا مني فرحتي اتلذذوا بصوت صرختي
ما انا الناس الطيبين اللي كانوا في حالهم ماشبين
وبعتوا لهم بلطجية
وانا أحمد وأنا مينا بيوقعونا في بعضنا
بس إحنا ايد واحدة قوية
وانا البنت اللي ماشية في امان الله وقفوها غصب عنها وكشفوا عن راسها الحجاب.. وانا اللي كل يوم بشوف
السرقة بالاكراه وانا اللي بيهددني كلب من ضمن الكلاب اني مش هاتهني بثورة واني هاعيش ايام عذاب
... معذور.. معذور ماهو دلوعة أهله بس واضح ان جهله نساه مين اللي حمله.. أو نسي بيتكلم مع مين دا انا
ملايين الملايين انا اهرامات وبقالها سنين انا سد عالي ونهر نيل انا جيش وشعب مالوش مثيل والتاريخ أكبر دليل.. وبعون الله ليل نهار ونهاره ليل
فسالتها من تاني... هو انتي مين في كل الدول؟
قالتالي يا ابني انا كل دول.. يا ابني انا ام المصريين... أم الدنيا
قلتلها والدنيا واخداكي لفين؟ قالتلي مش عارفة.. بس عمري ما كنت خايفة.. لان رب العالمين قال في كتابه الكريم علي لسان سيدنا يوسف الصديق الحكيم
بسم الله الرحمن الرحيم ادخلوا مصر ان شاء الله آمنين