اسف يا بلادى .......

_اسف انى جرحتك ، أسف انى بكيتك ..بس مش عارف هو الغلط عندى ولا عند اللى مسكينك ، يعنى هى غلطتى انى حبيتك ، غلطتى انى حلمت ببكره ورسمته غنوه لمستقبل ولادى ، ولا أكون غلطت لما فكرت إنى احوله من فكره لحقيقه ملموسه تتباهى بيها قبل مااتباهى...لا اكيد انا غلطت ، غلطت لما اتخيلت ان روحى مش أغلى عندى من حريتك ، غلطت لما اتخيلت انى ممكن اكون سبب فى بكرا أحلى لينا وليكى ...
_أنا أسف انى حلمت وكان حلمى خنجر طعنك فى أغلى ماليكى ، لكن مهو انا برده أغلى ما ليكى ، مش أنا شبابك ، أملك ، حلمك ، بكرا اللى كان مستنيكى ولما قررنا نتقابل كان يوم الحداد عليكى ...والله ماكان قصدى ولا دى غلطه منى ولا حتى فكرت للحظه انى أذيكى ، أنا بس حلمت انى اغير حلمت اشوف صورتى أجمل جوا عنيكى ...ولا حتى هو الحلم بقى حرام عليا وعليكى ...
_ بس كمان متعتبينيش انا لوحدى ، عاتبى اللى كانوا قبلى واللى اول معلمونى علمونى ازاى احبك واول ماحاولوا يحكولى كانوا بيحكولى كفاح شعبك ..علمونى ان حبك تمنه غالى وان وجودك لازم يكون اغلى من وجودى ، سلمونى كتاب من بره مكتوب كفاح ومن جوه صور شهيدك اللى ضحا لجل اراضيكى ،وقالولى دول اللى ضحوا عشان مستقبلى ومستقبل جيلى ، من يومها قررت انى مش حكون اقل منهم وزى ماهما ضحوا عشانى ، انا كمان حضى عشان ولادى ،عشان بكرا أجمل لينا وللأجيال اللى بعدينا ....بس للأسف بدل ما يشكرونى قرروا انهم يرجمونى والتهمه قال انى دبحتك مع ان كان كل همى انى انقذك واحميكى من كل خاين غرضه يدبحك او حتى يأذيكى ..وارجع واقول دى غلطتهم من الاول عشان علمونى ازاى احبك .ماهو حبك بقا وبا بيقتل كل اللى يصيبه .
_ دلوقتى انا خايف من بكرا ، خايف من ولادى ،بدل ماحيشكرونى شكلهم هما كمان ناويين يرجمونى على انى ضيعتك بدل ما احاول احميكى ..انا راجع تانى بتاسف بس المرادى مش لانى جرحتك ..لا ..ده لانى حكمل ، حكمل برده عشانك ، عشان ولادى ..وزى مابيقولوا انى طعنتك بايدى بس حداوى جراحك عشان انا املك انا شبابك ..انا حلمك اللى باقى من فتاتك ..ولا نسيتى ؟؟؟
_كفياكى الم ..كفياكى حداد .كفياكى حزن ..كفياكى دم وجراح نصبوها هما وانا اللى وقعت فيها ...انا اسف يا بلادى ، يا اغلى عندى من صوت انفاسى ..اسف انى حبيتك اكتر من حياتى....