بلدى يا بلدى يا قطر الندى

بقالى سنين متغربة
ولا يوم سمعت منك ندا
سايبة الغريب يبيع ويشترى فيا
سبتينى لده وده
مش ناوية ترجعينا
مش ناوية تحنى علينا
مش ناوية تفتكرينا
يرضى مين يفضل كده
بقالى سنين غريبة
فى بلاد غريبة
محتاجه تبقى قريبة
معقول الأم ترمى ولادها
أمراض وفساد ووباء
مظلوم الطفل اللى لسه بيقول واء
نقول إيه بس يادى العيبة
حرامية وفقر
وعشان أعيش فيكى
لازم يبقالى دهر
قال سافرت وقلت مش حتحمل شهر
لاقيت السنين بتعدى وقلبى كله قهر
على عمرى اللى راح وأنا بعيدة
على الأيام العنيدة
وببكى من جوايا عليكى وعليا
ببكى ونفسى تحسى اللى فيا
حترجعينى وتحنى
ولا بتصبرينى وبتضحكى عليا
مبقاش فاضل شى ليا
مبقتش قادرة اتحمل خلاص
يا يتعدل حالك
يا بطل أنا إخلاص
عارفه أنا مهما أقول
بحبك وحفضل احبك على طول
أهو كلام ساعة زعل مش بيطول
انتى كمان عايزة أكتم ولا أقولش
مش كفاية حلمت وبحلم ومبطلش
سيبنى أفضفض وأفضل غريبة
سيبينى فى حضن الغريب أتالم
سيبينى بس باردو من بعيد بسلم
ولما تحبى إنى أرجع تانى
ارجعى أنت كمان للزمن الاولانى
وقتها كل ولادك حيرجعوا
ولنداكى حيسمعوا
لكن طول ما أنت حرماهم
يوم ورى يوم
حتلاقى ولادك لأرضك بيودعوا