شمتان في مين؟

شمتان في مين قل لي أنا شمتان في مين ؟
شمتان في أمك و لا أبوك المقهورين
شمتان في أهلك اللي بايتين زعلانين
شمتان في مين
شمتان ف بلدك ولا ناسها الطيبين
بتحب وطنك ولا أصلك مش متين
هو انت مصري زينا ولا انت مين؟
شمتان في مين
شمتان ف اخوك ضابط مُهَدد في الكمين
ضحى بحياته عشان نعيش متأمنين
زوجته صبحت أرملة عياله لسه صغيرين
شمتان في مين
شمتان في جندي من ألوف مجندين
واقف يأمن الصحارى في طور سينين
اغتاله غدر أيادي قذرة مدنسين
شمتان في مين
شمتان في أم و أب عاشوا شقيانين
فقدوا ضناهم ثمرة شقاهم من سنين
ضيع حياته قنبلة مدسوسة وسط الآمنين
شمتان في مين
شمتان في أسرة فقيرة لكن مستورين
في شرم و لا الغردقة ويا الأجانب شغالين
الأمن مصدر رزقهم لو ضاع صيروا عاطلين
شمتان في مين
شمتان في قرية أهلها من الحضارة محرومين
عاشوا حياتهم كلها مش ع الخريطة منسيين
الدنيا شتت عندهم باتوا في ليلة غرقانين
شمتان في مين
شمتان في سياح من ضيوفنا الآمنين
اتقتلوا غدر وهم في بلاد مسلمين
سمعة بلدنا اتشوهت قالوا قتلنا السائحين
شمتان ف مين
يكفنا شَرَك و شر كل الشامتن
أعداءنا برة بالوطن متربصين
والخونة جوة بلدنا لسه مدسوسين
كالسيف علينا مسلطين
السوس بينخر جِدرنا اصحوا و فوقوا يا مصريين
الجيش و وحدة شعبنا طوق النجاة للغارقين
بالوحدة نحفظ أرضنا بالفُرقة نصبح لاجئين
ولسه فينا مُغيبين
يارب إحفظ مصرنا واكفينا شر الظالمين
إلهِمنا دحر عدونا ورد كيد الخائنين
وتبقى أم الدنيا قد الدنيا هبة المصريين
قولوا آمين