في ذكري يوم الأنتصار 6 أكتوبر 1973م

أنا زي النهاردة عام تلاته و سبعين.
كنت في المدرسة زي غيري من الملايين.
و فاكر أننا كنا في رمضان ….. صايمين.
قالوا لنا روحوا البيوت أنتوا اليوم مآجزين.
و بكره و بعده و يمكن كمان لمدة شهرين.
رجعنا البيوت و أحنا بنلعب فرحانين.
ح نام ونلعب ومش ح نذاكر اصلنا كنا مش عارفين.
أن جنودنا ع الحدود و على النصر متوعدين.
يرجعوا كرامتنا و لراية العزة رافعين، منصورين.
.
أخويه كان معاهم شايل سلاحه بأيده اليمين.
و جيراني عيسى و محمد و أحمد و حسين.
و خالي و عمي كانوا برضوا معاهم حالفين.
أنهم يرجعوا بالنصر عايشين كانوا أو ميتين.
و يزيلوا دمعه شعب م العين.
و يعودوا مرفوعي الرآس و الجبين.
خُفت عليهم و بكيت بس كل الناس كانوا فرحانين.
يقدموا أرواح ولادهم فدى الوطن الله عليكم يا مصريين.
.
أبويه قضى اليوم بيسمع الأخبار.
و أمي فردت المصليه تصلي تدعي الواحد القهار.
نعبر القناة و نزيل هموم الانكسار.
و ينعم علينا المولى بحلاوة الانتصار.
و يرجع أخويه منتصر عايش أو من الشهدا الأبرار.
دا جنودك يا مصر هم الجنود الأخيار.
.
ست ساعات و ولادنا عدوا القنال.
اصل قُدام الاصرار أبدا مفيش مُحال.
و مخلوش للعدو في الرد أي مجال.
تسلم يا جيش بلادي تسلموا يا أبطال.