طريق النور

كنا تلاتة..

كنا تلاتة والطريق واحد.. حزن وهم وغم.. والطريق واحد.. الحزن مال ع الغم.. والهم بقي واحد.. تبكي السما حالنا.. والليالي دموع.. والقلب اللي كان بيحلم بالحرية.. صبح موجوع.. كنا سند وحماية لوطنا.. وكانت صدورنا دروع.. شوفنا المرار والدمار بعيونا.. وعشنا سنوات ندافع عن كرامة شعبنا.. ودوقنا طعم الجوع.. وكان العدو قدمنا.. لكن عمرنا ما انهزمنا.. ولا عرفنا رجوع..
كنا تلاتة ع القناة.. أرواحنا كانت فداء ونجاة لأهلنا ودرنا.. وكان انتصارنا هدية للملايين والجموع.. الصمود والصبر بقي حالنا.. والخوف اللي عشش في العيون.. قدناه شموع.. قهرنا عدوان ثلاثي.. وما خفنا من الضرب والحرب. وأيام طويلة علينا كنا بنقاسي.. ودافعنا عن أرضنا وعرضنا وأرواحنا كانت طيور ترفرف في كل المدن والقري والنجوع..
عشنا تلاتة.. وكان اسمنا مدن النضال.. مدن القنال.. شريان أمال يجمعنا.. ودمنا في الوريد.. شايل كتير أحمال.. وقصة نضالنا وكفاحنا.. صبحنا بنرويها ونسقيها لأجيالنا اللي جايه.. مع كل أول سطر في كتاب الحياة.. وأول كلمة في مقال أو الجبال..
عشنا تلاتة.. والبدن واحد.. الأرض واحدة.. والأمل واحد.. والبيت اللي كان بيضمنا.. نسفوا العدو ما خلي فيه ولا واحد.. ودمر معاه حلمنا.. وسرق في سكته أحلي زهور عمرنا.. لكن كان حلمنا واحد.. تركنا البيت والأمل والحلم وتوهنا عن حياتنا سنين.. لكننا بعزيمة وحب كنا نواسي بعضنا.. وبأننا لأرضنا راجعين.. وهدفنا كان واحد.. رجعنا أرضنا .. بعد ما طال انتظارنا.. وحضن البيت والعيلة من تاني سترنا.. وعلي أنغام السمسمية غنينا وسهرنا.. وحكاينا عن ماضينا.. ولما حبينا نقول كلمتنا اتظلمنا.. والكل ظلمنا..
عشنا تلاتة.. ع ضفاف القنال.. نستني رزق حلال للعيال.. وكان حلمنا يعود لنا الحلم المحال.. وفي حرب أكتوبر شاركنا وعبرنا.. وانتصرنا وقلنا حققنا الآمال.. ومرت حياتنا وعمرنا وفضل جوانا السؤال.. امتي ناخد وسام النضال ونعيش زي خلق الله نحلم بالجمال.. ونزرع الأرض خير بضمير.. ونكسر في طريقنا الجبال لقينا ولاة أمرنا حرمونا من النسمة والكلمة أو حتي الخيال.. وصبحنا بنحارب عشان نعيش ع الكفاف والعفاف والرغيف الحاف اللي غموسه ذكريات حزن مع هم وغم.. ودم نازف في شوارعنا.. ودموعنا لسه بتستني الجواب من غير سؤال.
عشنا تلاتة.. مع تلاتين سنة وسنتين عجاف.. الكل باع فينا واشتري ولا حد دافع عن حقنا ولا شاف.. حتي باب الرزق اللي كان مفتوح لنا قفلوه علينا وشردونا بالآلاف.. والجمارك دمروها.. نشفوها.. والمدن اللي كانت حرة.. لجموها.. كتفوها.. حبسوها في بيوت عتمة وضلمة وحرموها.. من حد الكفاف..
الصبر طال بينا.. لكن شرارة ثورة يناير صنعناها بأيدينا.. وكان أول شهيد مننا ومن قلب أراضينا.. الفرحة بعد انتصارنا ع الظلم والجبروت رجعت لعيونا ولأهالينا ولما مات شباب الأهلي.. لقينا التهمة متوجهة لينا.. والتهديد كان من نصيبنا.. وصبح مكتوب علينا..
الدم. والهم لسه يا بلدي مالي القلوب.. كنا تلاتة ع الطريق.. وعاصرنا الحروب.. وإن كان الظلم جالنا.. والغم بقي حالنا.. ح نفضل كلنا أحرار.. ح ندافع عن حقنا رغم المرار.. وح نعيش حياتنا وعمرنا وفي أيدينا القرار.. وفي قريب جاي صاحي ح نحقق بأيدينا الانتصار.. وح نسند بعضنا من غير انكسار.. ونقول بعلو الصوت ح نكمل المشوار.. ح نكمل المشوار..