يا حزن ساكن كل دار.. يا عيون مسكونة مرار.. يا كل أم إنفطر قلبها علي ولدها والدمعة شمعة قايدة نار.. وأب مربوط في ساقية دايرة زي الرحايا وبيجري ع القرش الحلال والمال في إيدين الكبار.. يا كل هم وغم عاش في صدور الغلابة.. وفقر قاسم الضهر.. وأمراض بمرارة العلقم.. ومرارة الصبار.. وإن قلنا آه.. الآهة طالعة للسما.. مجروحة ومدبوحة بتستني النهار.. أيام وبتعدي علينا زي الجبال.. الحزن طال.. ومصايب بتجر في مصايب.. وإحنا في جدال.. مسودة قال.. دستور خيال.. والشوري مال.. والشعب يستني الإجابة علي السؤال.. ضاع الجواب.. وغاب السؤال.. ولامتي ح نعيش في الهموم.. وندوق مرار الصبر.. لحد باب القبر.. ويصبح سؤالنا الواحد مليون سؤال.. مفيش حقوق ح ترجع من غير نضال.. دم الشهيد راح والبكا أصبح محال.. وبراءة الأطفال راحت تحت عجلات القطار.. الحزن يملانا ونتوه جوانا.. ونعيد نفس السؤال.. والإجابة جاية مع السحابة السودة.. وشماعة الاهمال.. نفس الوشوش من غير رتوش بتكلمك.. نفس الملامح بقلب جامح ولسانها نابح تألمك.. نفس اللي عشناه من زمن بيعيش ويكبر يصدمك.. وأرواحنا في الدنيا أرخص م التراب ملهاش تمن عند اللي قادر يحرمك.. وكأننا في كابوس كبير.. بنام ونصحي عليه ويفيد بإيه الكلام.. والكلام أصبح له ألف لسان يرد عليك عمال يلجمك.. حرية إيه.. وإزاي وليه.. هو الضمير مبقاش عيونه مفتحة ولا العيون خلاص مش شايفة ألف دمعة ويا دمعة تسلمك.. الهم زاد.. والحزن زاد.. والغم جاي علينا من غير ميعاد.. والجروح طالعة م القلوب والروح عايزة تبوح ولمين تروح وكل يوم لونه زي الرماد.. وناره تستني الزناد.. ياشهرزاد.. إمتي الميلاد.. إمتي الميعاد.. إمتي العباد ترتاح م النواح وكتر الكلام وحصد الصبايا والولاد.. امتي يارب نفوق ونعيش زي خلق الله.. اللي عايشه بكرامة وإنسانية.. من غير فساد. الأرض عرض وعلينا نحميها من كل خاين أو عميل.. دي الأرض فلاح شقاه طيب.. ودمعه قريب.. وصبره جميل.. وصعيدي يوم عيدي جاي حزين وفرحة قليل.. والمصري اللي كان مصري زمان عايش في أمان.. دلوقتي شايل هموم الدنيا في جسم عليل.. والغيطان صبحت حيطان زرعها مايل.. بيتحايل علي المواويل.. وحدود أرضه مفتوحة لكل دخيل.. ومية النيل لا بتروي عطشان.. وكل إنسان فينا مغروس في الهموم وفاض بيه الكيل. مع السلامة.. وبقولها لكل طفل برئ.. قلبه لسه وليد.. مع السلامة يا فرح كان بيملا البيت.. ويحفظ الأناشيد.. مع السلامة ياضحكة طلة من بعيد لبعيد.. الدم طاهر.. والرب غافر.. وإيه راح يفيد الكلام.. بعد اللي راح.. وساب الجراح في القلوب مكتوب عليها الحزن مع أول سطر في دفتر المواليد.. أرواحها متعلقة في عبارة أو طيارة أو قطر سكة حديد.. وكل يوم في هموم.. ومفيش جديد. مع السلامة.. من قلب موجوع.. والجوع لكلمة حلوة تشفي البدن بإيدين يسوع.. وعيون نبينا محمد هادينا.. والسلام يهل علينا يداوينا.. وصوتنا يعلي من تاني يكون مسموع.. تمشي خطاوينا علي الأحزان.. نكسر الصمت اللي ساكن جوه الضلوع.. والحق اللي ضاع لابد جاي مع كل كلمة وداع مليانة دموع.. وبكرة إللي بنستناه ونتمناه.. نلقاه.. بيحضن إيدينا يخدنا معاه للطريق الواضح من غير رجوع.. قايد شموع.. وشجرة الأفراح تطرح سنابل الحرية في كل الفروع.. تملا النجوع والكفور بكل شكل ونوع..
