2012 ممكن كلمة بالراحة عليا شوية شوية إحنا يدوب سنة أولى حرية إحنا يدوب نبتدى خطاوينا ................. إحنا بنحلم زى ما نحلم زى ما ييجى الحلم علينا حِلِمْنَا كتير بنمد إدينا زاد الحلم صحينا لقينا باب حرية بندخل فيه ومن حوالينا ملايين واقفة بينهبوا فينا .................... لا سابوا الحلم ولا سابوا حروفنا ولا أوراقنا ولَّلا كُتُبْنَا حتى القلم الجاف بيكتب وبحبر أحمر بس رصاص جوة قلوبنا ونن عنينا ................ وأما تعبنا قالوا كفاية الحلم عليكم كان الحلم أكبر منكم إنتو يادوب تمشوا بخطاوينا رغم إن إحنا أصحاب الحلم ورغم المحنة قلنا إن إحنا اللى طلبنا نعيش ليالينا .................... استكترت الدنيا الفرحة ولا الحلم حرام يستنى وسارق الحلم ألوف حرامية بيلعبوا بينا ....................... نرجع تانى ونلبس طرحة ولا نقول آسفين يا أخينا نمسك توبنا سوا بإيدنا يرجع شط الوادى لسينا مطروح تجرى تنادى عريشنا رد الأقصر قال أهو جينا بالأحضان يا بلادى تاخدنا فى الإسماعيلية قنال وسفينة فى بحرى يقولوا فى مدح حبيبنا فى صْعِيدْ صوتها يِرَدد مينا ....................... اللى يقول حلمنا فَرَّقْنَا ييجى يشوفنا تاريخنا حامينا عيسى ومحمد صلوا عليهم ومريم قاعدة جنب أمينة بيقسموا لقمة وف إيد بعض خطوة بخطوة على أعادينا وف أحزانا بنشكى لبعض نلاقى لَمِّتْنَا جت تداوينا .................... كل كلامنا بطعم فرحنا كفاية علينا ليالى حزينة كل تراب الحلم يِكَبَّر اللهُ أَكْبَرْ ترجع تانى تِجَمَّعْ فينا ننسى الفُرقة ونار الْحُرقَة ننسى خلافنا ونرسم لوحة لجامع واقف جنب كنيسة ينادوا يا مصر تعالى خُدينا ....................... عمرنا يوم ماعرفنا البُعْدْ وعمرنا يوم ما لغيرنا شكينا ولا عايزين حد يفرقنا ولا هنسيب للفتنة مدينة مصر بلدنا هترجع تانى خطوة بخطوة هترجع لينا 2012 ممكن كلمة بالراحة علينا شوية شوية إحنا يدوب سنة أولى حرية إحنا يدوب نبتدى خطاوينا