كلمات ليست كالكلمات

*ماتهيصوش.. ماتفرحوش.. دى المسألة.. تغيير وشوش.. باراك أوباما.. أو جورج بوش - دى سياسة واحدة - دايماً معانا.. ماتفرحوش.. يا شعب طيب.. فرحك مغيب.. دمك ولحمك.. أرضك وعرضك.. غضبك وحلمك.. عند الخواجة - دول مايساووش.. فماتفرحوش.. دول حدايات.. مالهمش كلمة.. ولو حتى تحلف مليون يمين!.. لازم هتخلف.. ويوم ما تحدف حاجة بالشمال.. هترجع تاخدها.. تانى باليمين!..
 ساعة المصالح.. مايرحموش.. فماتفرحوش.. افهم يا صاحبى.. يا أبوالحضارة.. أنا عندى ليك.. مليون أمارة.. على أن دول مالهمش صاحب.. غير المصالح.. وإن كنت تقدر.. تلبس عليهم.. توب الشطارة.. حيدربكوها من فوق دماغك.. ولا حد يقدر عنك يحوش - فماتفرحوش - قلناها ييجى.. ميت ألف مرة.. يا إخوانا فوقوا.. شوفو المؤامرة.. مش بالأمانى تكبر بلادنا.. ولا بالأغانى.. يحلو حالنا.. يا إخوانا لازم.. نأكل بفاسنا.. نحكم برأسنا.. نكبر بذاتنا.. ساعتها نقدر.. نعيش حياتنا.. وسط الوحوش.. فماتفرحوش.
م. صلاح زكى معتوق
كفر الدوار - البحيرة
*أنا لا باكل باسطة، ولا عندى واسطة، وقاعد ع الباسطة، ياعم أمين... دافع الضريبة، لبلدى الحبيبة، وبقيت ع الحديدة، واروح لمين؟... لا عندى أطيان، ولا حتى بستان، طول عمرى غلبان، واشتكى لمين؟... الأسعار غلوها، والبلد باعوها، وياريتهم سابوها لناس مخلصين... زادت البطالة، فاكرينها شطارة، دخلنا المغارة، من ناس غدارين... وبقينا رعاع، وبطونا جياع، وهم فى متاع، ده فى شرع مين؟
عبدالنبى غريب عرابى
الإسكندرية - العجمى - هانوفيل
*هو احنا زى البهايم فى الزريبة مالناش أى حقوق؟.. ننحلب وننضرب ومفيش معاملة بذوق.. وممنوع علينا نبص لحظة لفوق.. ما نحلمش عشان إحنا اتولدنا فى رقبتنا الطوق.. زى البهايم نندبح وننسلخ ويعلقونا فى السوق لكن البهايم تندبح وتنسلخ وتموت.. لكن إحنا بعد ما بنندبح بنفوق.. وعيشتنا وحياتنا كل يوم بتسوء.. وحلمنا بيموت وبيندفن وطعم الهنا ماندوق.. بقت غريبة وضلمة ومش هتروق.. ولسه فاضل إيه والكل بات مسروق!
محمد عبدالفتاح بدر
*كان لينا زمان.. عزوة وشباب كافح وتعب.. وكمان كان لينا أبواب أرزاق.. وهبة خلاق.. نكتال المال، ونحوز ما نعوز.. فضة ودهب.. وجه اللى اشتال الجاه والمال.. بحرام بحلال.. فرار ونهب.. قام قايد فينا نار ولهب.. وادى احنا رماد.. عالأرض رفات.. بين الدخان.. من بعد لهيب النار ما خمد.. وبرد وهمد.. الدنيا كاسات.. تشرب وتدوق.. وتروح مدلوق.. وتغيب وتفوق.. تلقى اللى زرع غير اللى حصد!!
إسماعيل حسن محمد - الجيزة