أغنية جديدة لشعبولا بمناسبة خطاب أوباما

بدأ المطرب الشعبى، شعبان عبد الرحيم، المعروف باسم "شعبولا"، تسجيل أغنية جديدة بمناسبة زيارة الرئيس الأمريكى باراك أوباما إلى مصر، وتوجيهه خطاباً للعالم الإسلامى، لقى ترحيباً واسعاً.
ومن المتوقع أن يتم الانتهاء من تصوير الأغنية قريباً، حسبما ذكر المؤلف إسلام خليل، الذى يكتب معظم أغنيات المطرب الشعبى، مشيراً إلى أنه ستتم الاستعانة ببعض اللقطات المصورة لبرنامج زيارة أوباما للقاهرة، وجولته فى بعض المناطق الأثرية والسياحية.
وأشار خليل إلى أنه كتب أغنية خاصة بهذه الزيارة قبلها بفترة، وكانت تتضمن بعض الكلمات المتشائمة مثل "ماخربها بوش وروّح.. أوباما حيعمل إيه.. الكون مش راح يتصلّح بإشارة من إيديه" ولكنه قال، فى وقت لاحق الخميس: عندما استمعت إلى الخطاب، قررت حذف هذه الكلمات المتشائمة.
وتقول كلمات أغنية شعبان عبد الرحيم الجديدة، وفقاً لموقع Egynews التابع لاتحاد الإذاعة والتليفزيون: "من جامعة القاهرة ومهد الحضارة مصر، سمعنا باراك أوباما بيقول خطاب العصر.
علشان مصر الزعيمة اختارها لكلمته، وفاهم قيمة مبارك ومقدّر خبرته.
الكل قاعد منتظر أوباما هيعمل إيه، عايزين تفاؤل حذر منتكلش عليه.
الناس فى كل الأماكن بيقولوا أحسن من بوش، وباينه كويس لكن أنا برضه مضمنوش.
كويس مش كويس عايزين يبقالنا دور، وبلدنا فيها ريس فاهم كل الأمور.
يا عربى لم شملك يا عربى كفاية نوم، دى فرصة مش هتيجى ولا تحصل كل يوم.
متفتكروش أوباما ويّاه خاتم سليمان، هيقول افتح يا سمسم تتفتح البيبان.
لا نبالغ ولا بنقل من حبة السلام، ويا ريت يقدر يحل ميكنش بس كلام.
أصل الكلام كويس والناس بتقول جميل، بس إحنا اللى بيعجبنا بيتعب إسرائيل.
لو كان فعلاً كويس أكيد هيكرهوه، دول شر وكان عاجبهم سياسة بوش وأبوه.
عاملين زى الشيطان بيزِنِوا كتير كتير، ملهمش أمان وعالم مبيحترموش كبير.
أوباما كان خطابه للعالم أجمعين، للأمة الإسلامية ولصاحب أى دين.
بكرة الأيام هتثبت النية فيها إيه، لو خير كله هيدعيله ولو شر هندعى عليه.
فيه ناس مالهمش سيرة بيقولوا اشمعنى مصر، علشان مصر الكبيرة وصاحبة أغلى نصر".
يُذكر أن شعبان عبد الرحيم قدم أغنية سابقة للرئيس الأمريكى أوباما بعد فوزه فى الانتخابات الرئاسية بالولايات المتحدة.
وتقول كلمات الأغنية، التى كتبها أيضاً إسلام خليل: "أنا شايف الابتسامة والفرحة ع الوشوش، إياك باراك أوباما ما يكونش زى بوش".