بيرم التونسى ... حاتجن ياريت ياخوانا

بيرم التونسى الشاعر الساخر الذى ترك بصماته فى أدب الأمة العربية .. تحدث عن تونس وهو التونسى .. تحدث عم مصر كأنه مصرى .. اعتبره الشعب المصرى متحدث بلسان حالهم ... نجح بيرم التونسى فى تسجيل أحداث ويوميات المصريين .. كتب فى كل المجالات .. انتقد الحكام .. فكانت قصبدته الخالدة " المجلس البلدى " .. ثم تعرض لتصرفات الشعب المصرى فى نقد لاذع بعد عودته من انجلترا وفرنسا ومشاهدته لحياة مختلفة عما يراه فى مصر .. فكانت قصيدة " حاتجن " من القصائد التى أصبحت من أهم ما كتبه بيرم التونسى ..
وظل بيرم التونسى شاعر الشعب المصرى برغم كل ما بذلته الدولته المصرية لمحاربة كلماته ونقده اللاذع .. وتم نفيه خارج البلاد سنوات طويلة ولكنه ظل على حبه لمصر حتى عاد ومات فى مصر..
حاتجن ياريت ياخوانا
مارحتش لندن ولا باريز
دى بلاد تمدين
ونضافه وزوق ولطافه
وحاجه تغيظ
مالاقيتش جدع متعافى
وحافى
وماشى يقشر خص
ولا شحط مشمرخ افندى
معاه عود خلفه
ونازل مص
ولا لب أسمر
وسودانى وحمص
وانزل ياتقزقيز
حاتجن ياريت يا أخواننا
مارحتش لندن ولا باريز
**************
ولا عركه فى نص الليل
دايره بالحيل
وساحبها بوليس
قدامها جدع متجرجر
وشه معور
قال ايه دا عريس
الخلق ماهى بتتجوز
واشمعنى أحنا مفيش تمييز
حاتجن ياريت يا أخواننا
مارحتش لندن ولا باريز
**************
ولا واحده فى وش الفجر
تبرطع ماليه الدنيا صوات
قال ايه
جوز خالتى ام احمد
سلفة أخوها السيد
مات
سبحانك ماأعظم شأنك
والله الموت
دا مفيد ولذيذ
حاتجن ياريت يا أخواننا
مارحتش لندن ولا باريز
**************
ولا واحد طالع يجرى
وواحد تانى بيجرى وراه
ويقول هاهع حصلتك
يابن اللى ابصر أيه عاملاه
لا الشارع غيط ياأخواننا
ولا احنا بداره
ولا احنا معيز
حاتجن ياريت يا أخواننا
مارحتش لندن ولا باريز
**************
ولا واحد بيبيع حاجه
يقول بريال وتاخدها بصاغ
ياأخواننا دى حتى الابره
تاخدها بدوشه وقلب دماغ
حلفان
وعراك
ومناهدة
ويمكن ضرب كفوف
ياحفيظ
حاتجن ياريت يا أخواننا
مارحتش لندن ولا باريز
**************
ولا فيش ميت الف صعيدى
بتوع يابصيب هاجمين
ولافيش
ميت الف معوض داعس
جاى معاه صندوق ورنيش
والله كرهت القهوة
وحرمت أقعد ع الأفاريز
حاتجن ياريت يا أخواننا
مارحتش لندن ولا باريز
**************
حاتجن ياريت ياخوانا
مارحتش لندن ولا باريز
دى بلاد تمدين
ونضافه وزوق ولطافه
وحاجه تغيظ