لوحة مصرية مشخبطة

قلم رصاص خشب كبير ومسطرة
ولوحة بيضا تملا المكان
حلوة الحياة مش متسطرة
وارسم بايدى دنيتى
حلوة صافية مكررة
فيها السلام فيها الامان
و حياة انسان مش متنتورة
وبريشة واحدة
اشخبط والون
هنا ضحكة
وهنا جد
وهنا سخرية ومسخرة
وهنا ولد حب بنت وعملوا الحياة سكرة
وفوق بلد بتتقدم بتتثقف مش بتبص لورا
ومدارس تعلم ولادنا التاريخ
وتخرج علماء ومهندسين ودكترة
وبالخط العريض اكتب وازيد
كلنا انسان
وبلاش المنظرة
لا تقولى جدك ولا تقولى خالك
خليك بنفسك بدون فشخرة
حلوة اللوحة مشخبطة
فيها الناس متلغبطة
وساعتها لا ابيض ولا اسود
ولا دين يفرق بين البشر
انشالله يكونوا بيعبدوا لوحة مشخبطة
وناس بتحب بعض بجد
مش عاملة عبيطة ومستعبطة
اصل الحكاية فى اللوحة رسمة مخططة
بصوا عليها هنا محمد وهناك عيسى
واطفال لسة بريئة متنططة
فيها الطبيعة حلوة من غير حروب
ولا قتل روح فى الحياة متشعبطة
حلوة اللوحة ملغبطة