كادر المعلمين

قال بيقولوا كادر للمعلمين جايبين
قال عشان يرفعو شأن المعلم ويبقى كده من السلاطين
رفعوا المرتب رفعة وباقى على التمام اثنين
رفعو قصادها الدنيا ويدوب يكفوا يومين
فى التانية قالو نشوف اللى يستاهل مين
يمكن الامتحان يفوق ويحى بقى النايمين
راح المعلم وشايل قلمه الرصاص فى اليمين
وقعد يعلم على حاجة ويسيب حاجة ما هو خايف من اللايمين
لا فى يوم يقولوا دا فاشل ولو مر من عمره سنين
ممكن يكون مدير ولا ناظر ومعدى الخمسين
يقعد فى تختة عيال يمتحن ويمكن يكون كمين
عشان يحس بمهانة ويرجع لبيته حزين
مستنى النتيجة كأنه تلميذ من الخايبين
خايف لحظه يخونه ولا يكون من المحظوظين
تعب المعلم واتهان يا خلق كونوا شاهدين
لو كنتوا عاوزين ترفعوه مش لازم تنزلوه فى الطين
حسو بيه وقدروه دا بيخرج لنا ملايين
مش عشان قرش زياده وده حقه مش بيه عاطفين
تخلو الكل يتفرج ويقولو فى العلام فاشلين
طور وقدم وعلم واطلعه على الجديد فى الحين
مش بعد خمسين سنه تقوله تعالى انت ذاكرت وبقيت من الشاطرين
ولا خلاص راحت عليك اركن بقى مع الراسبين
انسى الخبره وانسى العلما اللى من تحت ايدك طالعين
عاوزين معلم روش يعرف يساير مجتمع ع العولمة فاتحين
وينسى بقى العقد ويعلا وياخد المية والخمسين
ويعيش ويحلم ويتمتع بالكنز ويا السلاطين