المقامة البلطجية !!

المقامة البلطجية ....حكالنا حنفي بن تامر وقال:-
رحت أسأل الشيخ نصر , شيخ بلطجية , مصر ورئيس جمعية , (بلطجة في حب مصر ) !! , قولتله : ايه البلطجة ؟ , قال لي: البلطجة , دي فن عليه رقابة , لها شيخ وليها نقابة , واحزاب واتحادات , عامة وجمعيات , ولت وعجن وزن ,انت ما سمعتش عن , التنظيمات دية :-
(حزب البلطجة ) ...(بلطجية من اجل مصر ) ... (رابطة بلطجي مصر )... (اتحاد البلطجية العرب )
قولتله : لاءة ما سمعتش , قال : معقوله ما سمعتش ؟ , دي اتحادات كبيرة , وجمعيات كتيرة !! , م الأقصر للعريش ؟؟ , قولتله : ما قولتليش , ايه هي البلطجة ؟ , قال لي : البلطجة دي صنعة , يا ابني ولكل صنعة , قواعدها واساسها , وادواتها وناسها !! , قولتله : ودي صنعة حلال ؟ , رد عليا وقال , : اه طبعا حلال , دي خدمة مقابل مال !! , قولتله : مقابل كام ؟ , قال لي : اهو دة الكلام !! , لكل شغلة تمنها , وموسمها وزمانها , فض الاعتصامات , غير تنظيم المسيرات , وهدم المخيمات , غير وقفة لانتخابات , قطع طريق مسافرين , غير قتل متظاهرين !! , لكل شغلة تمنها , وموسمها وزمانها , دة نظامنا يا سيدي فهمت؟ , قولتله : اه فهمت !! ,
قال لي : وبفضل الله , والحمد لله , البلطجة سوقها ماشي , مع اي حد ماشي , دلوقتي البلطجية , خرجو من الاكشاك , وبقوا منفتحين , في كل حتة فارشين , قاعدين هنا وهناك , ....تلاقي البلطجي , مستولى على شاطيء , بيأجر شماسي , وطرابيزات وكراسي , بالقوة للي ع الشاطيء , و بيبع برة وجوة, للعالم بالقوة ,....دلوقتي البلطجي , بقا فنان ثورجي , معمول له الف حساب , معادشي صايع فاضي , دة بقا ظابط وقاضي , بقا مدير وبواب , بقا استاذ جامعي , بقا سياسي كهين , بقا داخل في تكوين , الحرس جامعي , على رأي الحج أمين :-
البلطجي بقا سواق ............ بيبطلج ع الركاب
البلطجي ع الشواطي .......لابس تيشرت وكاب
البلطجي بقا شيخ .............واعظ لكن دحلاب
البلطجي لابس بدلة ......ومعاه شنطة فيها لاب
دلوقتي البلطجة , بقت احلا من زمان , فلوسها بقت اكتر , ومجالاتها بقت اكبر , بقت في كل مكان , دلوقتي البلطجة , بقت اشكال والوان , فيها شيوخ وشبان , فيها عيال ونسوان !! , ...بقا العيل على فكرة , بيبلطج بالفطرة , على زمايله ف الروضة , قولتله : يا وقعة سودة !! , حتى الكيدز بتبلطج , قال : كلها بتبلطج , هي جت على الإيدز ؟, قولتله : قصدك الكيدز , اللي هما الأطفال , قال : آه طبعا امال , الكون كله اتغير , معدش حد صغير !! , حدش محتاج توعية , كله فاهم امال ايه ؟ , قولتله : طيب ايه , نشاطكو كا جمعية , بتهدف للتوعية ؟؟ , قال لي : جمعيتنا , على اسمها جمعتنا , وشالت فوق كتافها , رسالتها وهدفها , في نشر البلطجة , والحمد لله , والفضل لله , قضينا على البطالة ,وشغلنا ووظفنا , شباب يامة ونضفنا , الايدي البطالة !! , ...وحافظنا على المباديء , الفوق الدستورية , , والفوق بنفسجية , والتحت بلطجية ,.... وف (سياحة وفنادق) , عملنا قسم (ارشاد ) , قولتله : قسم (إرشاد) ؟ , فاهم (ارشاد سياحي) !! , قال : مش (ارشاد سياحي) , قولتله : (ارشاد اخواني) ؟ , قال : ولا (ارشاد اخواني) !! , (ارشاد) مع الحكومة , الطالب يجي يتفرج , 4 سنين يتخرج , مرشد مع الحكومة , يخرج له وضع وإسم !!
, وخصوصا ان المرشد , يحترموه زي المنشد , له فكل شارع جارة , وفكل ارض عجارة !! ...بلطجي الحكومة , مبداه (فيها لأخفيها) , ويا تدفعله الاتاوة , يا تموت وتتاوى , ويستحيل الحكومة , تعادي اللي فيها !!.... شغلانة المرشد , تعتبر شغله ميري , وان فاتك الميري , اتمرغ ف ترابه , اه عاملة زي الخوخ , واللى ما يرضاش بالخوخ , بكرة يرضى بشرابه
قولتله : اه تمام , قال : فتك ف الكلام , والجمعية بتسعى , مش بتمانية لأ بتسعة , انها تفتح قسم , فكليه الآداب , خاص بالبلطجة , يدرس بلطجة , بصيت له باستعجاب , قال : كليه آداب , - قسم بلطجة - , شعبة سلاح أبيض , وهنعمل قاعات , للطلبة والطالبات , باسامي البلطجية , رمز كفاحنا واملنا , وبالفعل احنا عملنا, قاعة (ابراهيم الابيض ) , نجم البلطجية !!
قولتله : الله يا شيخ نصر , بجد فرحتني , كدة انت طمنتني , على مستقبل مصر !! , مش بتفكر تتوب ؟ , قال لي: أفكر اتوب ؟ , دي البلطجة دي متعة , ما بعدها متعة , بتحس بيها امتى ؟ , بتحس بيها وانت , بتبلطج على واحد , غلبان وتقوم واخد , منه حاجة غصب , بالقوة مش بالنصب , بعدين لقيته , حط اديه ورا ضهره , وقال لي : باقولك ايه , بالحق ؟ انت معاك ايه ؟
قال حنفي بن تامر : قولت يا خبر , ومكدبتش خبر , واخدت ديلي فسناني , واختفيت من مكاني , اه من قدامه جريت , ما انا لو كنت استنيت , كان هيثبتني ياني .....والختام