لبيبة الهبلة و الثانوية العامة

( الازدحام الشديد جعلني أفضل النزول من الميكروباص ،
بادرني السائق )
على فين يا أستاذ ؟
إيه ؟ نازل أمشي أحسن ، مش شايف الزحمة ؟
الثانوية العامة يا بيه كل سنة و أنت طيب ....
ثانوية إيه بس ؟ مش ها يشوفوا لها حل بقى ؟
إيدي على كتفك ، ده اللي عندهم واد في الثانوية بيبقوا زي اللي عندهم ميتم ، تصدق بإيه يا أستاذ ؟
لا إله إلا الله .
مراتي أعلنت حالة الطوارئ في البيت عشان البت ، أنت فاكر إني نازل عشان أدور على رزقي ؟ لا و اللي جمعنا من غير ميعاد ، ده أنا اتخنقت م البيت ، الكلام ممنوع ، البت بتذاكر ، التلفزيون ممنوع البت بتذاكر ، حتى الأكل بميعاد عشان البت لسه بتذاكر ، الله يقطع الثانوية العامة و اللي اخترعوها ، عشان كده قلت أنزل أفك عن نفسي شوية ...
لا حول و لا قوة إلا بالله ، طيب ممكن ثواني عشان أنزل ؟
ما هي واقفة أهي ، بس معلش ، هات الأجرة يا مواطن .
آسف ... نسيت و الله ...
( مددت يدي في جيبي ، أخرجت صرة الدنانير ،
فضضتها و أخرجت منها إحدى العملات المعدنية ،
ناولته إحداها و نزلت وسط الزحام الشديد ،
هرج و مرج هنا و هناك ، اختلط الحابل بالنابل ،
حاولت التسلل من بين الأجساد المتلاصقة ،
فجأة سمعت صرخة مدوية )
مش تفتح يا أعمى ؟
( نظرت لصاحب الصرخة ،
و إذا بها لبيبة الهبلة تجلس على الأرض ،
تغير تعبير وجهها عندما رأتني )
كده برضة تدوس عليا ؟ يعني ما تجيش غير منك يا أستاذ ؟
معلش آسف يا خالة لبيبة ، ما شفتكيش و الله ، إنتي إيه اللي مقعدك كده؟
مش الواد (حمو) عقبال أمالتك في الثانوية السنة دي ؟
معقولة ؟ اللهم صل ع النبي ، حمو بقى في الثانوية العامة ؟ بسم الله ما شاء الله ، و الله أنت ست بميت راجل ، طيب تعالي نقعد بعيد بدل ما أنتي قاعدة كده في الأرض و حد يدوس عليكي .
( مددت لها يدي فأمسكت بها و وقفت )
آخ ياني ، الله يقطع الثانوية و اللي عملوها ، مش تقول لهم يا أستاذ يلغوها أحسن ؟
يلغوها إزاي بس يا خالة لبيبة ؟ أمال نعرف إزاي مستوى كل طالب عشان يروح الكلية اللي يستحقها ؟
طب بذمتك يرضي مين إن الواد أو البت من دول يتحدد مستقبله على سنة واحدة ؟
ما احنا عملناها سنتين قولتوا جاي ، رجعوها سنة واحدة .
أيوة ما هو الناس بدل ما كانوا بينصبوا الميتم سنة بقوا بينصبوه سنتين .
طيب أهو ، أديك بتقولي ، نعمل إيه إحنا بقى ؟
خلوها من أول العيل ما بيدخل المدرسة من أولى ابتدائي ....
مش فاهم ؟
يعني العيل من أولى ابتدائي لغاية ما يوصل للثانوية العامة كام سنة ؟
اتناشر سنة تقريبا .
الله ينور عليك ، درجاته بقى في الاتناشر سنة دول مع بعض هم اللي يودوه الكلية المناسبة .
قصدك ناخد مجموع درجاته في السنين كلها و نقسمهم على اتناشر ؟
أني عارفه بقى ؟ قسموها زي ما تقسموها ، المهم ما يقفش مستقبل العيل على سنة واحدة ، بذمتك ده عدل ؟
عيل طول عمره بايظ و يجي في الثانوية العامة بالفلوس و إلا بالغش يدخل طب و الا هندسة و الا معهد فني تجاري ؟
و واد تاني زي (حمو) ده طول عمره الأول و جه السنة دي تعب و الا ظروفه كانت وحشة يروح في ستين داهية ؟
بالذمة هو ده العدل بتاع ربنا ؟
مش عارف و الله يا خالة لبيبة ، بس ها أحاول أكلم لك وزير الثانوية العامة حاضر و ندرس كلامك ده ، ليه لأ ؟
ها استأذنك أنا بقى عشان عندي مشوار مهم ....
( أخرجت سرة الدنانير التي أثقلت جيبي ، هممت بفضها لأخرج لها بعض العملات المعدنية ، إلا أنني آثرت الخلاص منها ، فقذفتها إليها ،
طارت لبيبة كما يفعل الحضري لالتقاط شقة البطيخ من زوجته ،
نادتني من بعيد )
إلاهي ربنا يسترك يا بيه ، إوعى تنسى تكلم لنا وزير الثانوية العامة ....
( أشرت بإصبعي من العين دي للعين دي و رحلت أقلب حلها العبقري )