و آآآآه .. يا يُمّه .. يا بهيّة !! آآهين يا خالتي الست بهانة !! ده شبابنا فِ مصر العربية .. حظه شويّة، و حالته.. حاله ..! شباب شغالة .. وإيده طويلة .. لكن حكامنا ، وحكماءنا .. ضِيقةْ صدرْ وِ قِلّة حِيْلة !! يا سِيْدنا العربي في كل مكان !! مولايا وسيدي السلطان .. مالك كده ساهي، وحيران ؟! نفسي أفهم .. لو كان بتفكر .. لِسّاك بتفكر بسّ ف إيه .. و إزاي بتفكر لسّه وليه ؟ والا تكونشي ما بتفكرش ؟ وكله أوانطة .. وهرش في هرش واللهِ .. يا عم السلطان .. أنت بجد خرمت دماغي وبقيت زيّك في التوهان !! ليه يا عم الحاكم بامرك .. طال مُلك أبوك وطال عمرك .. سايب أهلك، و شباب بلدك .. الناس اللي زيّ الفلّ .. نهباً لبطالة وقهاوي وبتاع بيسموه ترامادول (عارفه طبعاً)؟! و الا دا يمكن مش من طبعك .. أنا عارفك .. من عهد جدودك صاحب كِيف و مزاجك عالي .. طيب يا عم المزاجنجي .. سيبك بقة من شغل القافية .. وندخل في الموضوع طوّالي : يعني لو قلتلك أنك تقدر تشغل تنابلة السلطان بتوعك دولا يا عم الحلو و من بكرة .. تفتكر ردّك هيكون إيه ؟ يا إما رح تقول لي مافيش فلوس .. طيب يا عمنا الذكي هوّه حدّ طلب منك فلوس.. والاّ جابلك سيرة الفلوس ؟! خلي فلوسك دافية في جيبك .. أودايرة في بنوك العالم.. !! مش هنقولك حسنة قليلة .. ولا رح نهتف: " حاكم ظالم" !! واللا رح تقول لي مافيش فرص عمل في بلادنا .. طيب يا عم الغبي، عايز يعني تفهِّمني أن القاهرة كلها نضيفة و متشجرة ؟! وعروسة.. ننوسة، ومتغندرة؟!! وإلا بغداد اتبنت واتعمرت وراحت كلها أبراج في أبراااج؛ بعد ما الإحتلال خلاّها خراب في خراااب، و أكوام فحم وعمدان دخان؟!! والاّ يمكن (طوال العمر) شيوخ الخليج علِّموا مواطنيهم، وثقفوهم، ونوّروهم، ودرّبوهم، وانتقلوا بيهم من العالم الثالث والرابع والخامس إلى العالم الأول، والأول بشرطة؟!! واللا يمكن عايز تفهَِّمني أن الجيش الجزائري أنجز كل مشاريع بلده الإقتصادية بعد مشاريعه العسكرية وقاعد مستني بس، صافرة الإنطلاق نحو القدس، في موسم التحرير، في اليوم التالي ليوم انتهاء الصراع المرير بين الجيش السوري الحرّ و الجيش النظامي المضطرّ ؟! واللا الشباب السوداني .. !! جري الدم في عروقه من تاني ، وقام القومة و هبّ الهَبّة و حوّلها الرملة السودا الجردا بساتين خصبة و مراعي خضرا ، وبقى عنده رؤوس الغنم والمعيز والبقر أكثر من روس البني آدمين؟! و بقت قرون أصغر راس فيهم أطول من كل تيجان السلاطين ؟!! وإلا الشباب المصري يا ولداها المحبطين .. و مبضينين في أمها و سهرانين للصبح وقايمين العصر ملطوعين على المصاطب والقهاوي وفي النواصي دولا عمّروا، وخضروا الصحرا بدري بدري ، و ف مرحلة إستجمام الآن .. وآهوو بقه ما يمنعشي شوية فرفشة، على شوية نعنشة قبل ما ينطلقوا في غزوة جديدة للقمر يشقولو فرع من النيل، أو ترعة بتنبع من التحرير ويزرعولنا شوية فجل ، على شوية خس وجرجير، و شوية طماطم وبطاطس.. على شوية بقدونس و كرافس .. وإلا كوسة .. أيوه كوسة .. كوسة لكن غير الكوسة !! كوسة صحية وسليمة وخالية من المادة الكيماوية ، وخالية كمان م السوس والدود، و من الخلايا السرطانية؟! والاّ السادة القضاة .. السادة القضاة ووكلاء النيابة واللي زيّهم .. قصدي يعني المضربين عن العمل زيهم .. كان دي بس مجرد حيلة بحداقة وذوق، ولطافة ، و إستراحة مدفوعة الأجر .. و ده قبل ما يتوجهوا لجينيف يسألوا أمريكا وحلف الناتو .. همّا احتلوا العراق ليه؟!! يا عمنا التنبل وسيدنا السلطان .. يا صاحب الفخامة ، والسيادة ، والتاج، والصولجان مش ناقصينك .. بَطّل بقى شغل التوهان .. هوّه فيه أرخص من عُمَّالنا عَمَالة!! و آآآهي أيّ شغله ، في أي حاجة .. مهو برضك الإيد الخشنة .. أحسن م الإيد المحتاجة يا عم السلطان شغّلنا .. يا عمّ الله يخليك شَغّلنا .. و حياة الغالي عليك شغّلنا و حياة أبوك .. وحياة جدّك طاب وحياة أمّك حلفتك بالغالي عليك وحياااة كلبك !! طاب لو مش عارفين درّبنا .. طاب جرّبنا .. طاب اضربنا .. أو لو كنا مش عاجبينك .. طاب غيّرنا ! ده احنا احتارنا.. !! مهو شوف بقه بالعربي بقولك يا تشغلنا وتفرحنا .. يا تذبحنا .. يا إمّا تغور بقة وتريّحنا .. ونشوفلنا غيرك سلطان.. سلطان سلطان .. تقفيل برّه و لو هنجيبه من المَجَرّه سلطان م الأصلي بتاع زمان .. سلطان بحقيقي سلطان .. مش سلطان .. و باذنجاااان !! ***