"ماشي يا باشا " أوامرك يا باشا "،"إتفضل يا باشا "....أكيد لما بتسمع الجمل دي بتبقى متأكد إن اللي بيتكلم بيكلم ضابط و بتضايق أوي ..بس بصراحة عنده حق ،يعني المفروض يقوله إيه؟ أكيد مش هيقوله يا " بشمهندس " و يفكره إنه ماجبش مجموع هندسة في الثانوية العامة . ولا بعد الشر يقوله " يا أستاذ " زيه زي أي حد كدة عادي...ده أنت يا راجل لو دست على رجل واحد في أتوبيس بتقوله "معلش يا أستاذ " يبقى الضابط بجلالة قدره زيه زي بتاع الأتوبيس !؟ل لا لا عيب عليك يا راجل ميصحش ...خلاص فعلا أنسب حاجة نقول له يا باشا ،بس لازم نعرف برضه يعني إيه كلمة باشا ... معلش هنأخذ جولة في التاريخ عشان نعرف مين هو الباشا ..طبعا أنتم عارفين إن مصر استمرت تحت الحكم العثماني حوالي 500 سنة (و لو مش عارفين أديكوا عرفتوا) كانت الدولة العثمانية دي كبيرة أوي فكان السلطان العثماني بيعين والي على كل ولاية و كان لقبه يبقى "الباشا ". السلطان العثماني برضه حويط ، كان يخلي الوالي من دول ما يستمرش أكتر من 3 سنين في الحكم .الظاهر كدة كان عارف إن المصريين لما بيحبوا حد بيحبوه بزيادة شوية فكان بيخاف إن الشعب يأخذ على الوالي زيادة عن اللزوم و يحبه أوي فيطلبوا الانفصال عن الدولة العثمانية ...خلينا في المهم ، الوالي بقى كان أول ما يبقى والي (باشا يعني )كان بيعمل جدول كدة و يقسم وقته... عشان يشوف إزاي يستغل منصبه، دول 3 سنين يا عم ..ده في ناس بتفضل 30 سنة و مش بيكفوا برضه .فيحاول يستغل فترته في الحكم على قد ما يقدر. و هو و حظه بقى ..و شطارته كمان . كان يسيب البلد تولع و هو شغال في لم الفلوس و الذي منه ..يعني من الاخر كدة لو عايزين تعريف لكلمة باشا هيكون كدة الباشا : هو إنسان مستبد يستغل نفوذه و منصبه أسوأ استغلال و لا يهتم أبدا بمصالح الناس بل هو من نسى الغرض الأساسي من وظيفته و انشغل بما يمكن أن يستفيد به منها ...يخافه الناس (و يعملوا له ألف حساب ) و لكن لا يحترموه علشان كدة يا سعادة الباشا لما الناس تقول لك "يا باشا "متفرحش أوي عشان معنى كدة إن هما بيخافوا منك مش بيحترموك و الخوف ده كان موضة و بطلت ،فمش باقي لك إلا إحترامهم ..فاحترمهم يحترموك و يبطلوا يقولوا لك" يا باشا " و لما يقولوا لك "يا حضرة الضابط " ساعتها بس تكون كسبتهم ....ماشي يا باشا ؟