حوار فكرى مع كل بلطجى على أرض مصر !!!

بقلم علاء الغندور
حوارى مع كل بلطجى ...
رئيس جمهوريه غبى بتاع مصلحته ومصلحة عياله ............................ّ!!!
أبن رئيس جمهورية غبى و عشمان فى الرئاسه............................!!!
وزير مخلوع حرامى لص.........................................................!!!
قاطع طريق جبان ....................................................!!!
حزبى أفاق .......................................!!!!
رجل أعمال ضلالى..............................!!!!
أنا :انت ليه فرحان بنفسك كده و شايل السيف و ماشى؟؟؟!! أت ليه بتقول: يأ أرض أتهدى ما عليكى أدى؟؟؟!!
البلطجى:عشان عندى ضهر و اللى عنده ضهر ما بينضربشى على بطنه...
انا : الكلام ده كان زمان ياحبيبى قبل ثورة 25 يناير...الوضع اتغير دلوقتى بقى فيه قوانين و حاجات تانية .....حكم أعدام وسجن وتأبيدة ياروحى...
البلطجى : و ايه يعنى يا خويا ... ؟؟!! هوا انت بتهددنى ...؟؟!! لأ ياحبيبى دا إحنا كتير قوى.. و ماليين مصر فى كل مكان ... و زعيمنا الكبير لسه بيتمخطر فى شرم الشيخ ياحبيبى .. انت فاكر نفسك مين ؟؟...دا احنا عصابه يابا ... بأقولك أيه ... ابعد عننا أحسن لك ... روح كل عيش بعيد عننا وما تتنططشى علينا
أنا :طيب خد الخبر ده و أصحى من النوم ..امبارح الجيش مسك بلطجى و حكموا عليه بالسجن 25 سنه ...يعنى الجيش هيلّمكوا وهتروحوا ورا الشمس و فين يوجعك بقا...!!!
البلطجى :احنا ما بنخافشى و لا الكلام ده بيحّوق فينا..احنا قلبنا مات من زمان...!!!
أنا : وليه ما بتخافشى يا حبيبى؟ هو انت مالكش أهل تخاف عليهم والا اولاد بترعاهم ؟ و الا ما بتخافشى من الفضايح لما تتمسك وتجيب لنفسك ولأهلك وقرايبك العار؟
البلطجى : طبعا لأ... وأخاف ليه؟؟!!.... دا انا بصرف كل فلوسى على أهلى وولادى... ولعلمك بقا دول بياكلوا من الفلوس الحرام دى ومفيش حد منهم بيسألنى جبتها منين وكلهم بيخافوا منى وبيعملوا المستحيل عشان ارضى عنهم..كلهم عارفين انى سرقت و نهبت و اغتصبت و قتلت عشانهم...!!!!
أنا : طيب و مش خايف من ربنا؟؟؟!!! يقصف رقبتك أوممكن ينتقم منك فى الدنيا والآخره؟ و الا انت فاكر نفسك حتعيش على طول ؟؟؟!!!
البلطجى : يا عم سيبها على لله... قلبك أبيض.. قول يا باسط ... عيشنى النهارده وموتنى بكرة ... ياعم كبر الججمجمة... ربك غفور رحيم...!!!
أنا : بس فيه ناس اتفضحوا بعد ربك ما كان ساترهم 30 سنه و الناس احتقرتهم و شتمتهم
البلطجى : هيه الشتيمه بتلزق؟ ما يشتموا..و لا يهمنى و الناس كلها أساسا ما تهمنيش..اللى يهمنى القرش
أنا: و لما يخلص القرش ..هتعمل ايه؟ هتلبس طرحه و تنام فى البيت زى الولايه؟؟!!
البلطجى : ههههههههه..لا يا حبيبى..هناخد السيوف و السنج و الرشاش الآلى وهننزل نبلطج انا و معايا البلطجية بتوعى و هنهجم على البيوت او المولات و هنجيب فلوس و ذهب ولبس و كل حاجه نفسنا فيها..و لو نفسك فى حاجه قول لى و انا اجيبهالك و سلملى على الجيش
أنا : الله الغنى عن الحرام..طيب افرض ان الجيش قبض عليكم هتعملوا ايه؟
البلطجى :هنتصرف و هنهرب من السجن او نعمل نفسنا عيانين و ياخدونا المستشفى ونهرب من هناك و بعدين احنا لينا فى كل خرابه عفريت..اتطمن..مش هنغلب
أنا : طيب و لو ما عرفتوش تهربوا من السجن؟
البلطجى : يبقى السجن للجدعان
أنا:طيب انت حسيت بأيه لما اتسجن وزير الداخليه اللى كان بيحميكوا وبيشغّلكم؟
البلطجى: عادى..اللى تحت منه بيشّغلونا ولو دول اتقبض عليهم ..هنلاقى رجال الأعمال الحراميه يشّغلونا وهنلاقى أعضاء مجلس الشعب المزورين و كمان بتوع الحزب الوطنى
أنا: يعنى انت مش خايف ولا شايل هم بكره..طيب افرض بلطجى تانى ضربك بالسيف
و قطع دراعك وخّلاك تقعد فى البيت من غير شغله و لا مشغله..هتعمل ايه؟
البلطجى: و لا يهمنى..هأروح اشحت على باب السيده و أعمل سبّوبه لوز من هناك
أنا:طيب لو جت عربيه صدمتك وكسرت كل ضلوعك و فضلت نايم فى الجبس بقية عمرك
البلطجى: يا عم فال الله و لا فالك..ربنا يعطينى الصحه عشان الحريم اللى مستنينى
أنا: حريم ايه؟ هوه انت متجوز اربع ستات؟
البلطجى: لا..انا متجوز ام العيال بس..والباقى دول انا متحكم فيهم وبيدفعولى اتاوة عشان احميهم وكل واحده منهم لازم تدّلعنى والا يبقى يوم ابوها اسود
أنا: طيب وشرف الستات دى اللى انت بتغتصبها ما يهمكشى فى حاجه؟
البلطجى : شرف ايه يا حبيبى..دى كانت موضه قديمه وبطلت..خلاص..كله مباح
أنا : طيب يؤسفنى انى ابلغك ان فيه شوية بلطجيه خطفوا بنتك و أغتصبوها
البلطجى : شرفى..بنتى..يا ولاد الكلب.يا بلطجيه...الله يخرب بيت البلطجيه.
وخرج البلطحى باكيا ليجد الجيش فى انتظاره لينقذ مصر من بلطجية مصر...!!!
E-mail:alaabasha66@yahoo.com