رئيسك يا بلد .. لازم يكون وتد

ليلك طال وميت سؤال حواليكى
ليه الفجرمكسوف يخرج عليكى
ليه الادان بطل يدن فى اراضيكى
واللى يحاول ينسج خيوط النهار
بينهار
واللى يحاول يمسك الفاس
بيداس
طب الامل مين هيزرعه فى قلوب الناس
مين اللى هيرسمك علم فى الكراس
مين يا بلد حيلها فى هدد
اصلها مش زيادة عدد
تتباهى بيه وخلاص
انتى محتاجه وتد
يشد الحيل
يعلم الجميع معنى الاخلاص
اما اللى يبيع
ويتمادى فى التطبيع
هيضيع
وبرضه مش هيسلم من التقطيع
ما هو القطيع محتاج لراعى
ولمصالحه يظل ساعى
ومن الديابة يبقى واعى
وان مات له ميت
يعرف يكون له ناعى
ويكون دراعه ..دراعى
وماله .. مالى
وزاده .. زادى
ومن الساعة دى
يعرف الرخاء طريق بلادى
ويجمعنا فى الحب وادى
ونشمرايدينا ونقول يا هادى
نعمرونزرع
وعرقنا يسرح قناوى
واهاتنا تملا الكون غناوى
وتكون القهاوى
ملتقى للى هاوى
خطاوى للابداع
والامتاع للى غاوى
معرفش انا صاحى ولا نعسان
خايف لكون بحلم
واصحى من النوم على اوهام
او تكون دى حقيقة وانا فيها يقظان