في عيادة الأسنان.....الجزء الأول

فجأة شعر بألم في أسنانة وكأنها كانت في معاهدة سلام ثم نقضت العهد وقامت بمظاهرة كبيرة حملت كل ما يمكن من أسلحة فتاكة وسنج وبارود........دخل على شبكة الإنترنت يبحث عن علاج بالأعشاب حتى يوقف هذا الهجوم الشرس .....
علاج فعال للأسنان ينهي الألم في الحال....
بسرعة يدخل على الصفحة
مغلي البابونج وإستخدامة كمضمضة ....تمام
مغلي أوراق الشاي الاخضر تمام غيرة.... مغلي اوراق الخبيزة
يقلب الصفحات والمواقع ....
الألم يشتد سأجرب هذة الطريقة قرنفل بالنعناع ...بصل _زيت القرنفل_الثوم_ الخ الخ الخ
أخذ يحاول ويجرب كافة الأعشاب الممكنة ....
ولم تفلح محاولاته فجميعها باءت بالفشل وبدأت حرب الكواكب من جديد.... وفي النهاية تناول مسكن قوي مع كابسولة مضاد حيوي حتى يستطيع النوم.....
اليوم هو السبت إتصل الو عيادة الدكتور محمود
أيوة يافندم ممكن احجز كشف
الممرضة دورك رقم 30
30 ليه هو أنا في مستشفى ؟
بس المستشفى ب3 جنية وإنتوا كشفكم ب50 جنيه والضرس عليه 2000 جنيه
اجي امتى حضرتك....
ميعادك الساعة 12 بالليل
يذهب في الميعاد ....كام اللي دخل رقم 16 طب وأنا إن شاء الله هدخل امتى؟
لما بتوع البنج يخلصوا
البنج؟ 1،2،3،4 دول لسة 4
ايون بعد الاربعة دول حضرتك هتدخل عشان الارقام اللي قبلك ما حدش منهم جه ولو جم هيدخلوا قبلك.....
جلس على كرسي بجوار باب العيادة كان سمين لدرجة أن لحم أفخادة خرج من الكرسي وكرشة مترين قدام ....العيادة قد إمتلأت من البشر ....بجوار عيادة الأسنان عيادة عيون واضح أنهم أخوات ....جاءت إمرأة وجلست في الكرسي أمامة سدت مدخل الطرقة المؤدية للحمام هذة المرأة تبدو بدينة بعض الشئ ولكنها جميلة يبدو عودها ملفوف ظل يسرق النظرات وينظر من تحت النظارة على أردافها وبطنها المكتظة باللحم....
ثم جاءت إمرأة اخرى لم تجد مكانا لتجلس فية وقفت بجواره ....شم رائحة العطر فقلبة إنتفض من مكانة .....ياله من رائحة قوية تثير المشاعر....اخذ يتمتم بكلمات في سرة وعيناة تزوغان لهاتين المرأتين .....
تذكر زوجتة تسير امامة وكانها شوال بطاطس مبعجرة
ومعالم وجهها اصبحت ذكورية...
في أخر الطرقة في الواجهة شباك كان يجلس عليه غلام يبلغ من العمر خمسة عشر عامًا تقريبًا قام وجلس في الكرسي المجاور له كانت تجلس سيدة في منتصف العمر تحمل طفل رضيع ذهبت لترضعة في البلوكنة فإنتهز الفرصة وجلس مكانها ورآى هذا الغلام يزعق ويثور مثل الثور الهائج في طفلة لم يتعدى عمرها الثماني سنوات وأخذ منها كوب الماء ثم سكبة على الأرض .....
فقال له
ليه يابني كدة ؟ ليه تضرب أختك ...؟!
قال له هى لا أختى ولا أعرفها وأول مرة أشوفها
طب ليه بتعاملها كدة ونتشت الكباية منها وياريتك حتى شربتها
قال بعصبية
أنا مخنوق بابا قالي روح أحجز عند الدكتور وأنا عندي واجبات كتير عايز أعملها وعندي مدرسة بكرة الصبح وخايف ما قدرش أخلص الواجبات دي....
انت في سنة كام ؟
في أولى ثانوي
أنت الكبير ؟
أه أنا كبير أخواتي
بعد 10 دقائق جاء والده وعرفة من الشبه الكبير الذي بينهما وكذلك عندما رآى والده هب واقفًا ومسرعًا إليه....
في هذة الأثناء فتحت الممرضة غرفة الكشف ثم نادت أحمد علي
فهب واقفًا ومسرعًا وكل قطعة في جسدة تهتز وتهرول معه....
إتفضل....
دخل ...
سلام عليكم يا دكتور ......
عليكم السلام.....
يجلس للكشف ده هنخلعة وده هنحشبة واعملي أشعة على الضرس اللي جنبة مخروم وشكلة حشو عصب ....الميلغ 2000 جنية
يدفع زي الباشا ويذهب لعمل الأشعة.....
في معمل الأشعة....
إسم حضرتك وسنك
أحمد علي مدبولي 40 سنة
هتعمل بانوراما؟
ليه هو انا في حرب 6 اكتوبر؟
يافندم بانوراما على سنانك كلها ولا سنة واحدة؟
اااااااااه لأ ضرس
المبلغ 60 جنيه
يدفع المبلغ المتفق عليه
دخل حجرة الاشعة
إتفضل هنا لوسمحت
إفتح بقك وإضغط ع الشريحة
أهووووو
أنتظر لوسمحت 10 دقايق
الأشعة مهزوزة هنعيدها تاني
جهاز الأشعة كاد أن يخترق فمة
إضغط ع الشريحة
اهووووو
يسيل لعابة خارج فمه وهو ضاغط ع الشريحة
10 دقايق وهرجعلك....
يدخل الممرض معلش هنعيدها تاني المرة دي دكتور الأشعة جي
إفتح بقك لوسمحت
يضعط الدكتور بكلتا يدية على الشريحة
هفطس يا ناس...
انتوا بتولدوني من بقي حرام عليكم ما كنش ضرس ده
اه يا بقي مش عارف اقفلة....
بقالي 3 ساعات في الاشعة و5 عند الدكتور
حرام عليكم....
ثم قال له دكتور الأشعة ....
البقية الإسبوع القادم